Կարիք կա, որ ՀՀ վարչապետ Նիկոլ Փաշինյանն հանդես գան երևույթի հստակ գնահատականով
Երևանում և Հայաստանի շատ համայնքներում շարունակվում են տեղական իշխանությունների հրաժարականի պահանջով «հեղափոխական ակցիաները»։ Ակտիվացել են «պղտոր ջրերում որս անողները»։ Իրավիճակը կարող է վարակիչ դառնալ և անդառնալի բացասական ազդեցություն ունենալ տեղական ինքնակառավարման ինստիտուցիոնալ համակարգի վրա։
Ցանկացած հանրային պահանջ պետք է իրացվի իրավական սահմաններում, տեղական իշխանությունների նկատմամբ ցանկացած քաղաքական ուղղորդված հանրային ճնշում կարող է գնահատվել որպես տեղական իշխանությունների գործերին կոպիտ քաղաքական միջամտություն։
Պետությունը պարտավոր է երաշխավորել տեղական ինքնակառավարման օրենսդրական հիմքերը։
Իր պաշտոնավարման առաջին իսկ օրը ՀՀ տարածքային կառավարման և զարգացման նախարար Սուրեն Պապիկյանը հանդես եկավ շատ հստակ և հասցեական տեսաուղերձով, նշելով. «Վերջին շաբաթվա ընթացքում բազմաթիվ քաղաքացիներ, շարժման անունից հանդես գալով, գնում են տարբեր գյուղերի համայնքապետարաններ եւ պահանջում են գյուղապետերի հրաժարականը՝ դա կապելով շարժման հետ: Ես ի պաշտոնե, ամենայն պատասխանատվությամբ հայտարարում եմ, որ շարժման օրակարգում նման քայլեր չկան»։
Կարծում եմ, արդեն իսկ ՀՀ վարչապետի Նիկոլ Փաշինյանի հստակ ազդակի կարիքն է առաջացել։
Էմին Երիցյան
Հայաստանի համայնքների միության նախագահ,
Եվրոպայի խորհրդի տեղական ու տարածքային իշխանությունների կոնգրեսում ՀՀ պատվիրակության ղեկավար
