Մյասնիկյանի արձանին հարող այգու հաստաբուն ծառեր են հատվել

Այգու բարեկարգումը վրդովեցրել է քաղաքացիներին

Երեկ մեծ աղմուկ բարձրացավ, երբ պարզվեց, որ Մյասնիկյանի արձանին հարող այգում հաստաբուն ծառեր են հատվել: Հիշեցնենք՝ այգին բարեկարգում են «Գրանդ հոլդինգ» ընկերության սեփականատերերը՝ «Վարդանյան ընտանիք» բարեգործական հիմնադրամը:
Մինչդեռ քաղաքացիները մեծ դժգոհություններ են հայտնում այս տեսակ բարեկարգման վերաբերյալ. նրանք նշում են՝ բարեկարգել չի նշանակում հաստաբուն ծառերը հատել, այգին վերացնել:

Դժգոհության մեծ ալիք բարձրացրած եւ երեկ տարածված լուսանկարում երեւում է, որ բավականին շատ ծառեր են հատվել, իսկ երեւանցիները լավ հիշում են՝ մինչ բարեկարգումն այս այգին ծառաշատ էր եւ երեւանցիների համար սիրված զբոսայգի:
Երեկ Երեւանի քաղաքապետարանը թեեւ պարզաբանել է խնդիրը, սակայն այն երեւանցիներին չի գոհացրել:

Քաղաքապետարանը վստահեցրել է. «Այգում իրականացվող հիմնանորոգման աշխատանքների շրջանակում, մասնագիտական համապատասխան եզրակացությամբ, հատվել են չոր եւ ծերացած ծառեր: Բարեկարգման աշխատանքների շրջանակում նախատեսված է այգին համալրել քառապատիկ ավելի քանակությամբ նոր ու բարձրարժեք ծառերով, որոնք համահունչ են լինելու բարեկարգվող այգուն:

Նախորդ տարվա դեկտեմբերին, Երեւանի ավագանու որոշմամբ, հավանություն է տրվել այգին «Վարդանյան ընտանիք» բարեգործական հիմնադրամի կողմից բարեկարգելու առաջարկին, որը կնվիրվի Երեւան քաղաքի հիմնադրման 2800-ամյակին: Այս բարեգործական հիմնադրամը պատրաստակամություն է հայտնել նաեւ հետագա տարիներին իր միջոցների հաշվին իրականացնել այգու շատրվանների ինժեներական եւ տեխնիկական սպասարկումը, սարք-սարքավորումների խոտանման դեպքում՝ դրանց վերականգնումը, փոխարինումը նորով, վնասված սալերի փոխարինումը եւ վերանորոգումը, ինչպես նաեւ կանաչ գոտիների խնամքն ու սպասարկումը:

«Վարդանյան ընտանիք»-ի հետ ձեռք բերված պայմանավորվածությամբ այգում կարգելվի որեւէ առեւտրային գործունեության իրականացումը: Հիմնադրամը պարտավորվել է շինարարական եւ բարեկարգման աշխատանքներն ավարտել 2018 թվականի սեպտեմբերին»:

Երեւանի գլխավոր ճարտարապետ Տիգրան Բարսեղյանն էլ երեկ ֆեյսբուքյան իր էջում հրապարակել է այգու նախագծի լուսանկարն ու պարզաբանել է. «Ներկայացվող նախագծի հպանցիկ դիտարկումը արդեն իսկ կարող է փարատել մեր համաքաղաքացիների մտահոգությունը այգու կանաչ տարածքների եւ ծառերի առկայության առումով, իսկ ուրարտյան ժամանակի զարդանախշերով սալահատակն ու ժամանակակից լուծումներով շատրվանների շքեղությունը հնարավոր կլինի գնահատել միայն դրանք գործարկելուց հետո»։

Այս նախագիծը շատերին դուր չի եկել, նրանք վրդովված հակադարձել են. «Լավ կլիներ՝ չբարեկարգեին»: Ճարտարապետ Արսեն Կարապետյանն էլ Ֆեյսբուքի իր էջում գրել է. «Ո՞վ է ձեզ խնդրել ուրարտական նախշազարդեր նկարել, ո՞ր թիվն է: Որտե՞ղ է սա քննարկվել, ո՞վ է ձեզ ներշնչել, որ դուք իրավունք ունեք հասարակական տարածքին վերաբերող որոշումներ ընդունել միանձնյա (կամ տասնանձնյա): Ինչո՞ւ եք ձեր ցածր ու հնացած ճաշակը «փաթաթում քաղաքի վզին»:

Այսօր մի խումբ քաղաքացիներ բողոքի ցույց են նախաձեռնելու ժամը 12:00-ին, այգու մոտ՝ պահանջով՝ դադարեցնել շինարարությունն ու քաղաքապետ Տարոն Մարգարյանի հրաժարականը:

Պատրաստեց
ՆԵԼԼԻ ԲԱԲԱՅԱՆԸ

«Առավոտ»

16.05.2018