ՀՀԿ խմբակցության պատգամավորներ Արփինե Հովհաննիսյանը, Վահրամ Բաղդասարյանը, Գեւորգ Կոստանյանը, Անդրանիկ Հարությունյանը նախագիծ են դրել շրջանառության մեջ, որով առաջարկում են «Ոստիկանության մասին» ՀՀ օրենքում փոփոխություն կատարել ու բացառել ոստիկանի կողմից շարժական տեսանկարահանող սարքերով լուսանկարահանումը կամ տեսանկարահանումը։
Այսօր լրագրողների հետ զրույցում Գեւորգ Կոստանյանն ասաց, որ այդ նախաձեռնությունը մարտի 3-ին ենք արել, այսինքն, բացարձակ կապ չուներ քաղաքական իրադարձությունների հետ:
Հարցին՝ հետո կարո՞ղ է ՀՀԿ-ն անշարժ արագաչափերի ու տեսախցիկների հարցն էլ վերանայի, որովհետեւ դրանք էլ են ֆիքսում մարդուն ու գաղտնիությունն են խախտում՝ Կոստանյանը պատասխանեց, որ բազմաթիվ երկրներ կան, որոնք հաշվի առնելով տեսախցիկներով մարդու իրավունքների խախտման հանգամանքը, արդեն հրաժարվում են այդ տեսախցիկներից:
Բայց, ըստ նրա, յուրաքանչյուր մարդ հնարավորություն ունի տեսնել, որ այստեղ նկարահանվում է, հնարավորություն ունի մարդը կանխատեսել, որ անձնական գաղտնիությունը վերանում է. «Շարժական տեսախցիկներին դեմ էինք, որովհետեւ դա խախտումները կանխարգելելու նպատակ չի հետապնդում, այլ՝ պատժելու, նախօրոք չկան զգուշացումներ, որ նկարահանվում է: Մարդու իրավունքները խախտվում է, անձնական կյանքի գաղտնիության տեսանկյունից եւս խախտվում է: Դու հնարավորություն չես ունենում անձնական կյանքի գաղտնիությունը պահպանել, հետեւաբար նաեւ այդ սկզբունքն է խախտվում: Ցանկացած հանրային սրահ մտնելիս զգուշացում կա, որ նկարահանվում է օբյեկտը եւ մարդը կարող է չմտնի այդ տարածք»:
Իսկ ֆիքսված տեսախցիկները հանելու հետ կապված Կոստանյանն ասաց, որ հիմա ձեռնպահ կմնա դա անել: Պարզապես պետք է համապատասխան միջոցներ ձեռնարկվեն ավելի մեծ տարածության պայմաններում զգուշացնեն, որ այստեղ կա տեսախցիկ: Նա ասաց, որ պետք է հաշվի առնենք, որ այդ տեսախցիկները ոչ միայն ՃԵԿ-ի խախտումների մասին է խոսում, այլ՝ հանցագործություններ են բացահայտվում նաեւ այդ տեսախցիկներով. «Մենք չենք կարող ասել՝ վերջ, սա վատ է, պետք է վերացնենք: Պետք է հասկանանք, թե ինչ միջոցներ պետք է ձեռնարկենք»:
Հռիփսիմե ՋԵԲԵՋՅԱՆ
