«Մտահոգությունները չպետք է դարձնել օղապարան, ընդհանրապես»,-Aravot.am-ի հետ զրույցում ասաց «Ծառուկյան» խմբակցության պատգամավոր Վարդան Բոստանջյանը`անդրադառնալով կառավարության կազմին եւ այդ առիթով հնչող մտահոգություններին:
Թեեւ կառավարության ծրագիրը դեռ չկա, բայց տեսլականները հայտնի են, կազմն էլ արդեն ձեւավորված:
Կառավարության երիտասարդությունը մեր զրուցակցին չի հուսահատեցնում: Ասում է`ուզում ենք, թե`ոչ, մարդկության պատմությունը բոլոր հաջողությունները պայմանավորել է երիտասարդներով. «Դա դիալեկտիկայի հիմնական օրենքն է, օրենք էլ չէ, դա տիեզերական ճշմարտություն է: Պետք է ընդգծված ողջունել մեր երիտասարդների ճակատային մուտքը իշխանություն»:
Նա նաեւ կարծում է, որ հնչող մտահոգություններն էլ կարեւոր են. «Դա այն կարեւոր գործոնն է, որ այս պահին նրանցից յուրաքանչյուրը աչալուրջ, զգաստ լինի`հենց պայմանավորված այն հանգամանքով, որ այս պահին բոլորը նայում են մեր երկրին: Իսկ որ մենք կարողացանք արդեն լճացած համակարգից ազատվել, դա արդեն մեծ նվաճում է»:
Հետաքրքրվեցինք`ինչո՞ւ «Ծառուկյան» դաշինքին չտրվեց նախնական պայմանավորված հինգ պորտֆելը: Վարդան Բոստանջյանը պատասխանեց. «Ես կարծում եմ, որ պարոն Ծառուկյանը եւ Նիկոլ Փաշինյանը ունեցել են զրույց: Իհարկե, մենք երբեւիցե թույլ չենք տվել եւ ոչ էլ ցանկալի էր մանրամասների մեջ մխրճվելու, բայց հասկանալի էր, որ ամենայն հավանականությամբ, նման իրավիճակը ցանկալի էր երկու կողմերի համար»:
«Ծառուկյան» դաշինքի պորտֆելների եւ ԲՀԿ-ական նախարարների մասին՝ տեսանյութում
Նելլի ԳՐԻԳՈՐՅԱՆ
