ՀՀ արտակարգ եւ լիազոր դեսպան Արման Նավասարդյանը կարծում է, որ Պուտին-Փաշինյան երեկվա հանդիպումը եւ կողմերի քննարկումները հաջողված էին: «ՀՀ-ի արտաքին քաղաքականության ուղեգիծը մնում է նույնը, բայց մեր երկրի վարչապետը հայաստանակենտրոն դիրքերից է հանդես գալիս, ինչը շատ ողջունելի է»,-«Հենարան» մամուլի ակումբում լրագրողների հետ հանդիպմանն այսօր ասաց Արման Նավասարդյանը:
Ապա նա անդրադարձավ Արցախյան հակամարտության առնչությամբ Նիկոլ Փաշինյանի վերջին հայտարարությանը՝ «քանի դեռ Ադրբեջանն օգտագործում է ռազմատենչ հռետորաբանություն, փոխզիջումների մասին խոսք լինել չի կարող»: Արման Նավասարդյանի խոսքով՝ Փաշինյանը լավ է հասկանում, որ «Մադրիդյան սկզբունքները» փակուղի են տանում. «Հակամարտությունը պարզապես տարածքային խնդիրներով չի սահմանափակվում: Ադրբեջանը Թուրքիայի հետ միասին հայատյացության քաղաքականություն է իրականացնում»:
Արման Նավասարդյանը համոզված է, որ այժմ Արցախյան խնդիրը միջազգային ասպարեզում առաջ մղելու ճիշտ ժամանակն է. «ՀՀ-ն տարածաշրջանում ժողովրդավարության կղզյակ է դիտվում: Ռուսաստանը մեզ ստիպված «լավ աչքով» է նայելու, Արեւմուտքը՝ եւս»:
Ինչ վերաբերում է Ադրբեջանի կողմից հնարավոր ռազմական գործողություններին, բանախոսը նշեց. «Ադրբեջանը չի համարձակվում տեղից շարժվել, քանի որ Մոսկվան նախազգուշացրել է՝ չանել: Մոսկվան շահագրգռված չէ դրանով, ուստի զսպող դեր է կատարում»:
Լուիզա ՍՈՒՔԻԱՍՅԱՆ
