Վահե Ղալումյանը Իջեւան համայնքի ավագանու անդամ է: Նրան հարցրինք Նիկոլ Փաշինյանի համադասարանցի լինելու, Փաշինյանի անցած քաղաքական ճանապարհի, նրա կողմնակից լինելու մասին: Ղալումյանն ասաց.
«Նիկոլի հետ եղբայրս է համադասարանցի, մենք հասակակիցներ ենք եւ մոտ ընկերներ: Այսօրվա նման հիշում եմ նրա բուհ ընդունվելը ու լրագրողական գործունեության սկիզբը՝ իննսունականների կեսերին: Նիկոլի մասին սկսեցին խոսել, նրա նյութերը կարդացողների եւ նրա գործունեությանը հետեւողների թիվը գնալով մեծանում էր: Մենք հաճախ էինք խոսում իր գործունեության մասին, եւ երբ պատմեց թերթ ստեղծելու իր որոշման մասին, ես պարզապես շշմեցի: Բայց որոշումը կայացված էր՝ «Օրագիրը» ծնվեց ու դժվար, բայց հաստատակամ քայլում էր առաջ:
Քաղաքականության մեջ առաջին քայլը «Այլընտրանքն» էր, «Իմպիչմենտ» դաշինքը, այնուհետեւ՝ 2008-ի նախագահական ընտրությունները, ընդհատակ, բանտ ու այդպես շարունակ:
Նիկոլի հաջողություններն ինձ ոգեւորեցին, 2005թ. որոշեցի առաջադրվել Իջեւան քաղաքի ավագանու անդամ: Ընկերոջս «դաբրոն» ամենակարեւորն էր, Իջեւանի գրանցում ուներ, ընտրություններին էլ եկավ: Ընտրվեցի ու գործընկերներիս հետ սկսեցի ավագանու ըմբոստության մի մեծ պատմություն: Միշտ հետեւել ու հնարավորինս մասնակցել եմ այն քաղաքական գործընթացներին, որոնց Նիկոլը մասնակից է եղել: Վերջին քաղաքական գործընթացներին օր առաջ մասնակից դարձա ու նվիրվեցի: Շարժումը հասավ Իջեւան, մի քանի հազարանոց երթերն ու հանրահավաքները մեր ժողովրդի դիրքորոշումն արտահայտեցին»:
Հարցրինք, թե համաժողովրդական շարժման արդյունքում Հայաստանում եւ մասնավորապես Տավուշի մարզում ի՞նչ փոփոխություններ է ակնկալում: Նա հայտնեց. «Փոփոխությունները ու դրանց արդյունքներն իրենց երկար սպասեցնել չեն տա: ՀՀ քաղաքացին այլեւս չի հանդուրժի անարդարությունը, ընտրակաշառքը, կոռուպցիան, մենաշնորհն ու կլանային երեւույթները: Տավուշում ժողովուրդը ուրախ է ու որոշակիորեն հպարտ, որ Նիկոլը մեր համերկրացին է» :
Վ. Ղալումյանին հարցրինք՝ իրեն պաշտոն առաջարկվե՞լ է: Նա ասաց՝ չէ, նման բան երբեք չենք քննարկել:
Ոսկան ՍԱՐԳՍՅԱՆ
Լուսանկարը Վահե Ղալումյանի ֆեյսբուքյան էջից
