Հայ-թուրքական հարաբերություններում ՀՀ նորընտիր վարչապետ Նիկոլ Փաշինյանի եւ «Հայ հեղափոխական դաշնակցության» մոտեցումները բավականին համընկնում են, իսկ թե կողմերը որքանով միասնական կգործեն, ապագան ցույց կտա: Այս մասին այսօր «Պոստ սկրիպտում» մամուլի ակումբում լրագրողների հետ հանդիպմանն ասաց ՀՅԴ Հայաստանի Գերագույն մարմնի անդամ, քաղաքագետ Արթուր Եղիազարյանը:
Նա համոզմունք հայտնեց, որ հայ-թուրքական հարաբերությունները պետք է լուծվեն փաթեթային տարբերակով՝ հարց առ հարց քննարկելով. «Հայ-թուրքական հարաբերությունները պետք է կարգավորվեն, դա անխուսափելի է»: Հիշեցնենք, որ մարտին հայ-թուրքական արձանագրությունները չեղյալ հայտարարվեցին:
Քաղաքագետի բնորոշմամբ՝ Թուրքիայի հետ հարաբերությունները պետք է լինեն առանց նախապայմանների. «Մեր ամենամեծ զիջումն այն է, որ Հայոց ցեղասպանության հարցը որպես նախապայման չենք դնում: Թուրքիան էլ պետք է իր մոտեցումները վերանայի: Մինչեւ նա չհրաժարվի Արցախի հարցում նախապայմաններ առաջ քաշելուց, մենք ասելիք չենք ունենա: Մենք պատրաստ ենք երկխոսել առանց որեւէ նախապայմանի»:
Արթուր Եղիազարյանը նշեց՝ ՀՅԴ-ն ողջունում է Նիկոլ Փաշինյանի այն հայտարարությունը, որ Արցախը պետք է վերադարձնել հակամարտության բանակցային սեղանի շուրջ. «Սա հայկական կողմի ուղենիշը պետք է լինի: Հիմա պետք է ԵԱՀԿ միջնորդների հետ աշխատել եւ այդ մոտեցումը պնդել»:
Լուիզա ՍՈՒՔԻԱՍՅԱՆ
