«Ինչո՞վ էին վատ մեր թեկնածուները: Մենք շատ կադրեր ունենք, մեր սկզբունքները նույնն են: Արթուր Խաչատրյանն արդարացված մարզպետ էր, իսկ Արծվիկ Մինասյանն իր մասնագիտությանը համահունչ քաղաքական պաշտոն է զբաղեցնում հիմա»,-«Պոստ սկրիպտում» մամուլի ակումբում այսօր անդրադառնալով ՀՅԴ-ական ներկայացուցիչների՝ նոր կառավարությունում նախարարների պաշտոններում նշանակվելուն, ասաց ՀՅԴ Գերագույն մարմնի անդամ, քաղաքագետ Արթուր Եղիազարյանը:
«Վստահ ենք՝ այժմ Արծվիկ Մինասյանն ավելի ազատ դրսեւորվելու եւ իր ոլորտը առաջ տանելու հնարավորություններ ունի: Նախկինում որոշակի վերապահումներ կային»,-համոզմունք հայտնեց նա:
Եղիազարյանը կարծում է, որ ներկայիս նշանակումները կգործեն մինչեւ այն պահը, երբ տեղի կունենան նոր խորհրդարանական ընտրություններ՝ նոր ընտրական օրենսգրքով:
«Նոր նախարարները դեռ պետք է աշխատեն, շտապողական կարծիքներ պետք չեն: Պետական եւ քաղաքական ոլորտում մեծ կենսափորձ չունեցող մարդիկ են, անորոշությունը հարցեր է ծնում, բայց եկեք լավատես լինենք,-դառնալով երիտասարդ նախարարների նշանակմանը՝ նկատեց Արթուր Եղիազարյանը:
Լուիզա ՍՈՒՔԻԱՍՅԱՆ
