Այսօր վաղ առավոտյան Շիրակի պետական համալսարան եկավ կրթության և գիտության նորանշանակ նախարար Արայիկ Հարությունյանը, որը կարճ հանդիպում ունեցավ բուհի ռեկտոր Սահակ Մինասյանի, այնուհետ աշխատակիցների հետ ու պատասխանեց լրագրողների հարցերին։
Նա ասաց, որ այս ընթացքում հանդիպումներ է ունեցել բոլոր շահագրգիռ կողմերի հետ․ իր համար անընդունելի է ոչ ակադեմիական մթնոլորտը, երբ փոխադարձ վիրավորանքների պայմաններում քննարկվել են ՇՀՊ-ի ներքին խնդիրները։
«Ես երեկ հանդիպում եմ ունեցել ռեկտոր պարոն Մինասյանի, այսօր նույնպես առանձնազրույց ենք ունեցել, և մենք այս իրավիճակից դուրս գալու գտել ենք մեկ լուծում։ Գիտեք, որ խորհրդի նախագահ պարոն Ցոլակյանը երեկ հրաժարական է տվել: Նախորդ խորհուրդը ձևավորվել էր նախորդ իշխանությունների պայմաններում, կառավարության․կրթության նախարարության ներկայացուցիչները նախորդ իշխանությունների կողմից էին ներկայացված եղել։ Լուծումը հետևյալն է՝ ձևավորվել նոր խորհուրդ, որը ձեր մասնակցությամբ, մեր վերահսկողությամբ, օրենքի տառին համապատասխան կանցկացնի ռեկտորի նոր ընտրություններ։
Պարոն Մինասյանը շատ լուրջ քայլի է գնացել, որը շատ ողջունելի է: Այսօր ռեկտորի պաշտոնակատար կնշանակվի պարոն Երվանդ Սերոբյանը՝ ռեկտորի տեղակալը։ Հաջորդ շաբաթ ես նորից կայցելեմ Գյումրի, առանձին հանդիպում կունենամ ուսանողների և դասախոսների հետ։Նորից եմ ուզում շեշտել՝ սա շատ լուրջ քայլ է պարոն Մինասյանի կողմից իրավիճակը հանդարտեցնելու համար, սա փոխզիջումային տարբերակ է և ողջունելի տարբերակ է, որպեսզի ակադեմիական մթնոլորտը բուհում վերականգնվի, որպեսզի այն լարվածությունը, որը կար տարբեր խմբերի միջև, հանդարտվի», -ասաց նախարարը։
Նախարարը ռեկտորի պաշտոնակատարին խնդրեց դիտարկել հեռացված երկու դասախոսների՝ Հովհաննես Խորիկյանի և Գագիկ Համբարյանի վերականգման հնարավորությունն առաջիկա շաբաթների ընթացքում։
Նա նաև նշեց, որ բոլոր բուհերում խնդիրները պետք է լուծվեն բանակցությունների, փոխզիջումների միջոցով, պետք է հաշվի առնել, որ Հայաստանում իրավիճակ է փոխվել և ունենք նոր իրողություններ, որը չպետք է օրինականության դաշտից որևէ մեկին դուրս բերի։
Արայիկ Հարությունյանը նաև նշեց, որ կրթության և գիտության նախարարությունը չունի որևէ կողմնապահություն այս հարցերում, նախարարությունը բոլոր շահագրգիռ կողմերի տրամադրության տակ է, բացառապես աշխատելու է՝ ելնելով ոլորտի շահերից և որևէ մեկին առավելություն չի տալու։
Սահակ Մինասյանը ևս ելույթ ունեցավ։ Նրան հարց ուղղեցին, թե կմասնակցի՞ արդյոք ռեկտորի նոր ընտրություններին, վերջինս ասաց․ «Հետոյի մասին կասեմ հետո»։
Այն հարցին էլ , թե պարտադրված հրաժարակա՞ն էր սա, թե՞ ինքնակամ, պարոն Մինասյանն ասաց․ «Ես կարծում եմ նախարարի խոսքից հետո հարց չկար տալու, պարզ էր, որ քայլն արել եմ ես»։
Նունե ԱՐԵՎՇԱՏՅԱՆ
