«Ամերիկայի ձայն». ԱՄՆ-ի դեսպանությունը տեղափոխվեց Երուսաղեմ: Բացման միջոցառմանը ներկա էին Ջերարդ Քուշներն ու Իվանկա Թրամփը, ԱՄՆ-ի պետքարտուղարի տեղակալ Ջոն Սուլիվանը, ֆինանսների նախարար Սթիվ Մնուչինն ու մի շարք կոնգրեսականներ:
ԱՄՆ-ի դեսպանությունն այսուհետ կգտնվի Երուսաղեմում: Ամերիկյան բարձրաստիճան պատվիրակությունը ժամանել էր Երուսաղեմ՝ բացման միջոցառմանը մասնակցելու համար: Ամերիկյան նախկին հյուպատոսության շենքը կծառայի որպես դեսպանատուն մինչեւ կընտրվի ապագա դեսպանատան կառուցման մշտական վայրը:
Այս առումով պատվիրակության անդամ, ֆինանսների նախարար Սթիվ Մնուչինն հայտնել է.
«Նախագահ Թրամփը պատրաստակամ էր իրականացնելու իր խոստումը և իր վճռականության շնորհիվ մենք այսօր այստեղ ենք եկել՝ դեսպանության բացմանը մասնակցելու համար»,- ընդգծել է Մնուչին:
Իր հերթին Եվրամիության երկրների մեծ մասը բոյկոտել են այս առիթով Իսրայելի արտգործնախարարության կազմակերպած միջոցառումները: Չնայած դրան՝ շուրջ 30 երկրներ մասնակցեցին միջոցառումներին:
Իսրայելի վարչապետ Բենյամին Նեթանյահուն տեղեկացրեց նաև, որ շուտով Երուսաղեմ կտեղափոխվեն Գվատեմալայի ու Պարագվայի դեսպանությունները:
«Տեղափոխեք ձեր դեսպանությունները Երուսաղեմ, քանի որ դա ճիշտ քայլ է և կօգնի խաղաղության հաստատմանը »,- հայտարարել է վարչապետ Նեթանյահուն:
Պաղեստինյան կողմը, սակայն դեմ է այս որոշմանը՝ ընդգծելով, որ Երուսաղեմի կարգավիճակը պետք է որոշվի վերջնական համաձայնագրի միջոցով:
«Նրանք խախտել են Երուսաղեմի առումով ստատուս քվոն, որը ամրացված էր Անվտանգության խորհրդի բանաձևերով: Նախագահ Թրամփը դրժել է Օսլոյի խաղաղության համաձայնագրով ԱՄՆ-ի ստանձնած պարտավորությունները»,- նշում է բարձրաստիճան պաղեստինցի պաշտոնյա Նաբիլ Շահաթը:
ԱՄՆ-ի կողմից դեսպանության տեղափոխումը քննադատվել է արևմտյան եւ մի շարք այլ ղեկավարների, որոնք ընդգծում են, որ այս միջոցով ԱՄՆ-ն էլ ավելի կսրի պաղեստինա-իսրայելական հարաբերությունները, որը կարող է նոր բռնությունների շարժառիթ դառնալ:
