Եվրասիական տնտեսական հանձնաժողովի այսօրվա նիստում, որին, հիշեցնենք, մասնակցում էր նաեւ ՀՀ նորընտիր վարչապետ Նիկոլ Փաշինյանը, կայացվել են կարեւոր որոշումներ, որոնք կնպաստեն ինտեգրացիոն ծրագրերի առաջխաղացմանը: Այս մասին այսօր ԵՏՀ նիստի ավարտին լրագրողների հետ հանդիպմանն ասել է ԵՏՀ կոլեգիայի նախագահ Տիգրան Սարգսյանը: Նրա փոխանցմամբ՝ այդ հարցերի թվում է երրորդ երկրների հետ ԵՏՄ երկրների հնարավոր գործակցությունը:
Սարգսյանի խոսքով՝ նիստում ներկայացվել է ԵՏՄ-ին ՀՀ-ի եւ Ղրղզստանի երկամյա անդամակցության հաշվետվություն, որը կազմվել է ՀՀ եւ Ղրղզստանի կառավարությունների հետ համատեղ. «Արդյունքը գերազանցեց մեր սպասելիքները: Փոխադարձ առեւտրի ցուցանիշները կտրուկ աճել են: Դա նշանակում է, որ ԵՏՄ-ի առեւտրային պայմանները դրական են ազդում երկու երկրների առեւտրաշրջանառության վրա»:
Տիգրան Սարգսյանը նաեւ հայտարարեց, որ մի քանի տասնյակ երկիր հետաքրքրված է ԵՏՄ-ի հետ ուղիղ տնտեսական կապեր հաստատելու հարցում. «Դա վերաբերում է, օրինակ, ազատ առեւտրի համաձայնագիր կնքելու հնարավորությանը»: Սարգսյանի փոխանցմամբ՝ Իրանն աստիճանաբար բացում է իր զարգացող շուկան, ԵՏՄ-ն էլ հետաքրքրված է Իրանի հետ առեւտրային կապերի խորացմամբ:
Լուիզա ՍՈՒՔԻԱՍՅԱՆ
