«Եթե ասում ենք նոր իշխանություն, ուրեմն թիվ մեկ քայլը սովորաբար բանտերի դռները բաց անելն է, և որ քաղաքական կալանավորներն ազատվեն»,-«Հայելի» ակումբում լրագրողների հետ հանդիպմանը հայտարարեց Գերագույն խորհրդի նախկին պատգամավոր Ազատ Արշակյանը:
Պարոն Արշակյանը հայտնեց՝ իր համար միանշանակ է՝ բոլոր նրանք, որոնք քաղաքական նկատառումներով ազատազրկվել են անկախ նրանից, թե ինչ մեղադրանք է առաջադրված, ինչ հոդվածով են ազատազրկված, պետք է ազատ արձակվեն. «Պետք է այնպես արվի, որ այդ բանտային խցիկները դատարկ չմնան, այնտեղ պետք է հայտնվեն քաղաքական վճիռ կայացնողներն ու իրավական գործընթացը կատարողները, որ այսօրվա իշխանությունն ականջին օղ անի»:
Քաղաքական գործիչ Գուրգեն Եղիազարյանը հիշեցրեց. «Նիկոլը չի ասել, թե բոլոր նրանք, որոնք մարդասպանություն են գործել, ծանր հանցագործության մեջ մեղավոր են, մենք համարում ենք զրոյական դիրք: Ասել է՝ չի լինելու վհուկների որս, վենդետա: Պարոնայք, սպանությունների համար պիտի պատասխան տաք»:
Ազատամարտիկ, «Հիմնադիր խորհրդարանի» անդամ Գագիկ Սարուխանյանի համոզմամբ՝ նոր կառավարության առաջին իսկ գործը պետք է լինի ցանկացած օր երկիրը տանել նոր ուղղությամբ. «Երբ հեռացնում են մի մարդու, պետք է հեռացվի ամբողջ համակարգը: Ես, իմ ընկերները եկել ենք ռեժիմը փոխելու: Եթե Սերժ Սարգսյանին հեռացնելու խնդիր կա, ինչո՞ւ Սերժ Սարգսյանի օրոք հանցավոր ճանապարհով փոփոխված Սահմանադրությունն այսօր փոփոխման չի դրված: Մերժիր Սերժին կարգախոսով հանդես եկողներն ինձ հետ զրուցելիս ասել են, որ այդ կարգախոսն ուղղակի հարմար է, բայց առհասարակ, պայքարն ուղղակի ամբողջ համակարգի դեմ էր: Անգամ ոչ հեղափոխական պայմաններում Ռոբերտ Քոչարյանը եկավ և դաշնակներին ազատ արձակեց՝ հայտարարելով, որ իրադրություն է փոխվել»:
Տաթև ՀԱՐՈՒԹՅՈՒՆՅԱՆ
