Ալբինայի վիրահատությունն անվճար է, բայց ճանապարհածախսի,
այլ հարակից ծախսերի համար գումար է պետք
Երեկ իր վեցամյա դստեր` Ալբինայի հետ «Առավոտի» խմբագրություն էր եկել Իշխան Միրզոյանը: Արմավիրի մարզի այս բնակիչը մարզային իշխանություններին դիմելուց ու աջակցություն չստանալուց հետո հասել է մայրաքաղաք` օգնություն ակնկալելով որեւէ կառույցից: Մեկ-երկու օրից երեխային պիտի վիրահատության տանի, սակայն միջոցներ չունի հիվանդանոցային որոշ ծախսեր հոգալու համար: Վիրահատությունն անվճար է, սակայն Իշխան Միրզոյանի խոսքով՝ կան հարակից ծախսեր, որոնք պետք է կատարվեն` ճանապարհածախս, հիվանդանոցային որոշ պարագաների, դեղերի համար: Դիմել է Արմավիրի մարզպետարան` գումարի ակնկալիքով, բայց պատասխանել են, որ օգնել չեն կարող:
«Առավոտի» հետ զրույցում քաղաքացի Միրզոյանը դժգոհություն հայտնեց, որ անապահով ընտանիքների համար նախատեսված օգնություններից՝ հատկապես, որ Ալբինային միայնակ, առանց մոր է մեծացնում, իրեն բաժին չի հասնում, սակայն «ջիփ»-երով մարդիկ, մարզպետարանի աշխատակիցներին մտերիմ «քավոր-սանիկ» օգտվում են այդ օգնություններից:
Իշխան Միրզոյանը հանուն արդարության ասում է, որ մեկ անգամ մարզպետարանն իրեն 40 հազար դրամով օգնել է, սակայն հիմա էլ գումարի հարցը կարեւոր է, երեխայի առողջության հետ է կապված խնդիրը: Նպաստով հարցը չի կարող լուծել, այդ մի քանի հազար դրամով հոգում է երեխայի խնամքի հետ կապված հարցեր, սնունդ:
Ալբինայի աչքը պետք է վիրահատեն. օրն արդեն նշանակված է: Երեխայի ձեռքը բռնած՝ Իշխան Միրզոյանը փորձում է մինչեւ վիրահատությունն այդ գումարը հայթայթել, որպեսզի դրա պատճառով վիրահատությունը չհետաձգվի:
Իշխան Միրզոյանը միայնակ հայր է եւ, իր խոսքով, մեծ դժվարությամբ է երեխայի կենցաղային կարիքները հոգում: Արմավիր քաղաքի Բաղրամյան Ա թիվ 228 տանը վարձով է բնակվում, եւ որպեսզի երեխային տանը միայնակ չթողնի, Ալբինան գիշերօթիկ է հաճախում: Մինչ այս, ինչպես Իշխան Միրզոյանն է պատմում, օրավարձով հողագործական աշխատանք է կատարել, սակայն այս տարի այդ գործն էլ չի գտնում, նրա խոսքով՝ մարդիկ կամ հողատարածքները չեն մշակում, կամ խնայողություն անելու համար հողի հենց սեփականատերերն են իրենց այգիները մշակում:
ԼՈՒՍԻՆԵ ԲՈՒԴԱՂՅԱՆ
«Առավոտ»
12.05.2018
