Հայտնում ենք, որ երեկ՝ մայիսի 11-ին, բանտից ազատ է արձակվել Հիմնադիր խորհրդարանի նախագահ, քաղբանտարկյալ Գարեգին Զուգասզյանը, որն արդեն 18 օր գտնվում է առողջությանը սպառնացող հացադուլի մեջ:
Գարեգին Զուգասզյանն այսօր մամուլի ասուլիս է տվել Մատենադարանի տարածքում և որոշել այնտեղ հացադուլին զուգահեռ նստացույց իրականացնել, քանի որ Մատենադարանն է եղել 1988թ․-ին սկսված համաժողովրդական շարժման օրրանը:
Մատենադարանի տնօրինությունը, որի հոգաբարձուների նախագահը նախկին վարչապետ Սերժ Սարգսյանի եղբայրն է, հրաժարվել է հացադուլավոր Գարեգին Զուգասզյանին աջակցել և տրամադրել կենցաղային պայմաններ, և ավելին՝ պատասխանել է. «Թող Գարեգին Չուգասզյանը գնա և իր տանը հացադուլ-նստացույց իրականացնի»։
Մենք Հայաստանի հոգևոր կենտրոն Մատենադարանի տնօրինության այս վերաբերմունքը համարում ենք նենգադուլի /սաբոտաժ/ դրսևորում և հորդորում ենք երկրում հեղափոխական իրադրությանը նենգադուլ հայտարարած ուժերին սթափվել և գիտակցել, որ երկրում ստեղծված է նոր իրավիճակ, և նրանք չեն կարող անտեսել այդ փաստը և շարժվել նախկին վարչախմբի հիմնած բռնապետական օրենքներով:
Հայաստանի հանրությունը նախկինում արդեն ականատեսն է եղել մեր հացադուլավոր եղբայր և գաղափարակից Արթուր Սարգսյանի ողբերգական մահվան, որը տեղի ունեցավ նախկին վարչախմբի անմարդկային վերաբերմունքի արդյունքում։
Նշենք նաև, որ Գարեգին Զուգասզյան մտավորականը Մատենադարանի՝ 30 տարի տնօրեն աշխատած Բաբկեն Զուգասզյանի որդին է, և նրանց ընտանիքը մեծ ներդրում է ունեցել Մատենադարանի կայացման գործում:
Մատենադարանի տնօրինությանը հորդորում ենք հետևել արժեքային հեղափոխության առաջնորդ Նիկոլ Փաշինյանի հայտարարած սիրո և հանդուրժողականության սկզբունքին և շուտափույթ լուծում տալ հարցին:
Հիմնադիր խորհրդարանի հաղորդագրություն
