Քաղբանտարկյալների ազատման պահանջով հացադուլի մեջ գտնվող «Հիմնադիր խորհրդարան» ընդդիմադիր շարժման համակարգող եւ զանգվածային անկարգություններ կազմակերպելու համար մեղադրվող Գարեգին Չուգասզյանը, որը երեկ ազատ է արձակվել խափանման միջոց կալանքի վերացման արդյունքում, այսօր Մատենադարանի դիմաց լրագրողների հետ զրույցում ասաց, որ, իր բնորոշմամբ, քաղբանտարկյալների ազատման գործընթացը սկսված է:
«Այն սկսվել է դեռեւս Անդրիաս Ղուկասյանի՝ կալանքից ազատմամբ, շարունակվել իմ՝ կալանքից ազատմամբ: Նոր իշխանությունն ինձ վստահեցրել է, որ գործընթացը շարունակական է լինելու առաջիկա օրերին: Դա նշանակում է, որ իմ հացադուլի առաջին պահանջը կատարվում է»,-համոզմունք հայտնեց Չուգասզյանը՝ նշելով, որ իրեն նման երաշխիքներ է տվել ՀՀ առաջին փոխվարչապետ Արարատ Միրզոյանը:
«Առաջիկա շաբաթում եւս այլ ազատումներ կլինեն, վերաքննիչ բողոքներ կքննվեն: Տարբեր գործիքների օգտագործմամբ ազատումներ կլինեն»,-հայտնեց նա: Նա հավելեց, որ երկու լրացուցիչ պահանջ ունի նոր իշխանություններից՝ համաներում շնորհել սոցիալական կարիքից դրդված մանր հանցագործություններ կատարած դատապարտյալներին: Երրորդ պահանջը, նրա ձեւակերպմամբ արդարադատության անցումային կառույցի ստեղծումն է, որն արագ լուծումներ կտա խնդրահարույց իրավական հարցերին:
Գարեգին Չուգասզյանը նաեւ ասաց, որ ՀԽ-ն աջակցելու է նոր իշխանություններին, իսկ ՀՀԿ-ի կողմից հնարավոր դավադրությունների դեպքում՝ խաղաղ անհնազանդության զանգվածային գործողություններ իրականացնելու:
Լուիզա ՍՈՒՔԻԱՍՅԱՆ
