Սթենֆորդի համալսարանի պրոֆեսոր, «Պատմության ավարտը» հայտնի գրքի հեղինակ Ֆրենսիս Ֆուկույաման հարցազրույց է տվել «Դոժդ» հեռուստաընկերությանը, որում պատմել է այն մասին, թե ինչ կանի Մոսկվան Հայաստանում ստեղծված իրավիճակի հետ: Նա նաև անդրադարձել է այն հարցին՝ ինչու Վրաստանում ժողովրդավարական հեղափոխությունը չի կարելի համարել ավարտված: Ֆուկույամայի խոսքով՝ Եվրոպայում ստեղծված քաղաքական իրավիճակը նման է 20-րդ դարի սկզբին ֆաշիզմի ստեղծման ժամանակների իրավիճակին:
Գնահատելով Հայաստանում ստեղծված իրավիճակը` Ֆուկույաման ասել է. «Հուսադրող է այն առումով, որ մարդիկ դեռ կարող են միավորվել, նրանց դեռ կարելի է բարկացնել, նրանց դուր չեկավ այն փաստը, որ Սարգսյանը պատրաստվում է պահպանել իր իշխանությունը՝ չունենալով արդեն նախագահ դառնալու հնարավորություն… Մարդկանց մեծ մասին արդեն ձանձրացրել են այն առաջնորդները, որոնք ցանկանում են ցմահ կառավարել: Կենտրոնական Ասիայում նման շատ ղեկավարներ կան:Այնպես որ, այս առումով շատ դրական եմ գնահատում Հայաստանում տեղի ունեցող իրադարձությունները:
Միևնույն ժամանակ, թվում էր՝ Հայաստանը չունի զարգացած քաղաքացիական հասարակություն, նույնը կարելի էր ասել նաև Ուկրաինայի մասին մինչև Նարնջագույն հեղափոխությունը: Բայց հանկարծ պարզվեց, որ տասնյակ հազարավոր մարդիկ կարող են հավաքվել, դուրս գալ փողոց և բողոքել: Ես մտահոգված եմ, քանի որ Հայաստանը կախվածության մեջ է Ռուսաստանից, և կարծում եմ վերջինիս շատ է անհանգստացնում Հայաստանում տեղի ունեցող իրադարձությունները: Ուստի, իմ կարծիքով, անկախ ստեղծված իրավիճակից Ռուսաստանը ջանք չի խնայի Հայաստանին իր ազդեցության գոտում պահելու համար, ինչպես Ուկրաինայի և Վրաստանի դեպքում»:
Առավել մանրամասն՝ տեսանյութում:
Պատրաստեց՝ ՎԻԿՏՈՐՅԱ ԱՆԴՐԵԱՍՅԱՆԸ
