Համահայկական մեծ ընդվզումը պետք է թակի նաև կոռուպցիայի, ընտրակեղծարարության և բռնակալական համակարգի օջախներից մեկը հանդիսացող Երևանի քաղաքապետարանի դռները:
Այս ուղղությամբ ողջունելի են բոլորի ջանքերը, մասնավորապես՝ ողջունելի է 2018 թվականի մայիսի 10-ին քաղաքացիների կողմից ինքնակազմակերպման միջոցով անցկացված՝ ընդդեմ Տարոն Մարգարյանի և Երևան քաղաքի ավագանու դեմ բողոքի ակցիան:
Բողոքի ակցիայի մասնակից Երևանի ավագանու «Երկիր Ծիրանի» խմբակցությունը ՀՀԿ-ական ավագանու անդամների լուսանկարներով խրտվիլակներ և գրություններ էր պատրաստել: Ակցիայի ընթացքում ելույթ ունեցան նաև խմբակցության անդամներ Մարինա Խաչատրյանը և Սոնա Աղեկյանը, իսկ խմբակցության ղեկավար Զարուհի Փոստանջյանը լրագրողների հետ զրույցում հատկապես կարևորեց քաղաքացիների կողմից ինքնակազմակերպված և ցանցային բողոքի յուրաքանչյուր գործողության անցկացումը, և շեշտեց, որ Տարոն Մարգարյանի, Սերժ Սարգսյանի և ՀՀԿ-ականների կողմից հանրային միջոցների յուրացումը պետք է դիտարկել քրեական հետապնդման տիրույթում:
Երևանի ավագանու «Երկիր Ծիրանի» խմբակցությունը, ի թիվս այլ առաջնահերթ խնդիրների, հրատապ է համարում Երևան քաղաքի ավագանու արձակումը և Երևան քաղաքի նոր քաղաքապետի ու ավագանու արտահերթ ընտրությունների անցկացումը, որի ուղղությամբ շարունակաբար իրականացնելու է հետևողական և լայնածավալ բողոքի գործողություններ:
«Երկիր Ծիրանի» կուսակցության լրատվական ծառայություն
12 մայիսի 2018
Երևան
