Վարչապետ Նիկոլ Փաշինյանը, ինչպես և խոստացել էր, քիչ առաջ ուղիղ միացման ընթացքում բացատրեց, թե ինչու է ոստիկանապետի պաշտոնում նշանակել Երևանի վարչության պետի նախկին տեղակալ Վալերի Օսիպյանին:
Նա նշեց, որ Հայաստանի Հանրապետության օրենսդրության համաձայն, ոստիկանապետի պաշտոնում պետք է նշանակվի ոստիկանության համակարգից կամ հարակից համակարգերից որևէ պաշտոնյա. «Ըստ էության, հնարավոր չէ համակարգից դուրս մարդ բերել և ոստիկանության պետ նշանակել»:
Նիկոլ Փաշինյանը ընդգծեց, որ ոստիկանությունում որևէ պաշտոնյա չկա, որի նկատմամբ բողոքներ չլինեն. «Տվյալ դեպքում երկար մտածելով իմ ընտրությունը կանգ առավ Օսիպյանի վրա հետևյալ պատճառով՝ Վալերի Օսիպյանը կոռումպացված չէ, և սա ոստիկանական համակարգում քիչ պատահող երևույթ է: Վալերի Օսիպյանը նաև որևէ կլանի անդամ չէ, այդ թվում՝ ոստիկանական կլանի անդամ:
Եվ, ըստ էության, ոստիկանական առաջխաղացման համար Հայաստանի Հանրապետությունում երկար տարիներ գործել են ձեզ և մեզ հայտնի մեխանիզմներ՝ տանիք, մեջք, թիկունք, և այլն: Եվ Վալերի Օսիպյանը, ըստ էության, լինելով Երևան քաղաքի վարչության պետի տեղակալ, իր կարիերան արել է, պետք է ճիշտ ձևակերպեմ, ըստ էության, փողոցներում սևագործ աշխատանք անելով, և նա այդ դիրքում հայտնվել է նաև այն պատճառով, որ որևէ կլանի անդամ չէ և կոռուպցիոն համակարգի մաս չէ, և կոռումպացված կոռուպցիոն համակարգի ներկայացուցիչները կարողացել են այդ սևագործ աշխատանքից խուսափել իրենց հովանավորյալների շնորհիվ, և այսպես ասած, տանիք չունեցող մեկը հայտնվել է այդտեղ»:
Փաշինյանը հավելեց, որ 2007 թվականից Հայաստանի փողոցներում քաղաքական գործունեություն է ծավալել, և Վալերի Օսիպյանի հետ «դեմառդեմ մարտը» շարունակվել է մինչև 2018 թվական. «Մենք նրան, ըստ էության, ամբողջովին ճանաչում ենք: Եվ նաև մեր քննադատությունները նրա հասցեին պիտի դառնան այն լծակը, որը պիտի օգնի, որպեսզի Վալերի Օսիպյանը լինի այն ոստիկանապետը, որ անհրաժեշտ է Հայաստանի Հանրապետությանը»:
Փաշինյանը կարևորում է սիմվոլիզմը. «Մենք ըստ էության հանում ենք ժողովրդի և ոստիկանության միջև եղած փշալարերը, և դա անում ենք մենք, մեր քայլով: Ուզում եմ հավաստիացնել, որ Վալերի Օսիպյանի առաջ դրված են շատ կոնկրետ խնդիրներ, ես նաև ասել եմ, որ շատ արագ այդ խնդիրները պետք է լուծվեն, որ հանրությունը շատ արագ համոզվի, որ ոստիկանությունը փոխվում է դեպի լավը, և ոստիկանությունը ոչ թե փոխվում է, այլ փոխվել է, և ինքը պետք է լուծի կոնկրետ խնդիրներ:
Այսօր ես երեք հիմնական խնդիրներ եմ դրել՝ մարդու իրավունքների պաշտպանությունը, որը ոստիկանության համար պետք է լինի առաջնահերթություն, կրիմինալ ակտիվությունը պետք է հասնի նվազագույն մակարդակի և ընդհանրապես ոստիկանությունը պետք է վերջ տա ամենուր և ամեն ինչում մարդկանց տուգանելու մոլուցքին: Ես ևս մեկ խնդիր եմ առաջադրել պարոն Օսիպյանին մեր խոսակցությունների ժամանակ, որ ընտրակաշառքի ինստիտուտը ընդհանրապես պետք է արմատախիլ արվի»:
Ամի ՉԻՉԱԿՅԱՆ
