Ազգային ժողովի «Ելք» խմբակցությունում Նիկոլ Փաշինյանի մանդատը փոխանցվելու է «Քաղաքացիական պայմանագիր» կուսակցության վարչության անդամ Ալեն Սիմոնյանին։
Նիկոլ Փաշինյանը պատգամավոր էր ընտրվել թիվ 4 ընտրատարածքից, իսկ Սիմոնյանը երկրորդն էր այս ընտրատարածքում «Ելքի» հավաքած ձայների քանակով։
Պատգամավոր կդառնա նաեւ «Քաղաքացիական պայմանագրի» անդամ Հրաչ Հակոբյանը՝ Նիկոլ Փաշինյանի կնոջ եղբայրը: Հրաչ Հակոբյանը երրորդն էր հավաքած ձայների թվով 3 ընտրատարածքում։ Առաջինը Արարատ Միրզոյանն էր, որը նշանակվել է առաջին փոխվարչապետ, իսկ երկրորդը՝ Արայիկ Հարությունյանն էր, որը նշանակվել է կրթության եւ գիտության նախարար։
Փոփոխություններ կլինեն նաեւ Երեւանի ավագանիում «Ելք» խմբակցությունում: Ավագանու անդամներից Արայիկ Հարությունյանը, ինչպես արդեն նշեցինք՝ նշանակվել է նախարար, Տիգրան Ավինյանը՝ փոխվարչապետ, Էդուարդ Աղաջանյանը՝ վարչապետի աշխատակազմի ղեկավար, Ալեն Սիմոնյանն էլ՝ պատգամավոր:
«Ելք» դաշինքի համամասնական ցուցակում հաջորդ չորսը Վիկտոր Ենգիբարյանը, Նելլի Ղարդյանը, Ռուբեն Ռուբինյանը եւ Նարա Հովհաննիսյանն են:
