«Սասնա ծռերի» գործով պաշտպան Արայիկ Պապիկյանը համոզված է, որ ՀՀ նախկին վարչապետ Սերժ Սարգսյանի իշխանությունը դեռ շարունակում է գործել դատարաններում: Այսօր նա լրագրողների հետ զրույցում նման կարծիք հայտնեց դատարանում՝ դատավոր Արշակ Վարդանյանի կողմից «Սասնա ծռերի» խափանման միջոց կալանքը վերացնելու միջնորդության մերժումից հետո:
«Հավանաբար, Արշակ Վարդանյանը սպասում էր, որ իրեն նոր հրաման տան, որովհետեւ նման դատական գործերում միայն հրահանգով են աշխատում: Հրահանգ, հավանաբար, չի եղել, եւ լավ է, որ չի եղել: Դա նշանակում է, որ նոր իշխանությունները հրահանգներ չեն տալիս: Վարդանյանը չհասկացավ, որ ինքը դատավոր է եւ պետք է արդարադատություն իրականացնի»,-նշեց Արայիկ Պապիկյանը:
Նրա բնորոշմամբ՝ դատավորն «ինստրուկցիա չուներ, չգիտեր ինչ անել, այդ պատճառով մերժեց միջնորդությունը՝ շարունակելով հին ձեւով աշխատել: Ապա` փաստաբանը դիմեց բոլոր դատավորներին. «Զգուշացնում եմ՝ հրահանգի չսպասեք, Նիկոլը կամ որեւէ մեկը ձեզ հրահանգ չի տալու, արդարադատություն իրականացրեք: Իսկ եթե չեք կարող, վայր դրեք ձեր վկայականները եւ հեռացեք»:
Հիշեցնենք, որ ի նշան դատավորի գործողությունների հանդեպ բողոքի՝ «Սասնա ծռերի» աջակիցներն այսօր փողոց են փակել:
Մանրամասն քիչ ուշ՝ տեսանյութում:
Լուիզա ՍՈՒՔԻԱՍՅԱՆ
