Ինչպես հայտնել ենք, վարչապետ Նիկոլ Փաշինյանի առաջարկով մի քանի նախարարներ արդեն նշանակվել են, այդ թվում՝ Հրանուշ Հակոբյանին փոխարինողը՝ Մխիթար Հայրապետյանը:
Վերջինս Երիտասարդ քաղաքական գործիչների ասոցիացիայի փոխնախագահն էր եւ «Քաղաքացիական պայմանագիր» կուսակցությանն է միացել 2015-ին: Մինչ այդ մասնակցել է Մարտի 1-ն նախորդած բողոքի ցույցերին՝ լինելով ուսանող: Նա սովորել է ԵՊՀ արեւելագիտության ֆակուլտետում:
Նա Մարտի 1-ի հարցով խորհրդարանական լսումների ժամանակ ԱԺ ամբիոնում ելույթ ունեցավ եւ այսպիսի պատասխանատու հայտարարություն արեց. «Մարտի 1-ի գործով շատ բան ասել չենք կարող, որովհետեւ որեւէ մեկի համար գաղտնիք չի, անգամ մարտի 2-ին գաղտնիք չէր, թե ով է կանգնած այդ ոճրագործության հետեւում:
Այլ բան է, որ մենք խնդիր ունենք պատասխանատվության մասով՝ իրական մեղավորներին պատժելու մասով: Որեւէ մեկը այս դահլիճում, անգամ դահլիճից դուրս ինձ չի կարող ասել, որ անհրաժեշտ քաղաքական կամք եւ ցանկություն դրսեւորելու դեպքում անգամ 1 օրը բավարար չէր լինի, որ իրական մեղավորները դատարանի առաջ կանգնեին եւ իրական պատիժները կրեին: Հետեւաբար, այն իշխանությունները, որոնք գնացին այս ճանապարհով ունեին կաշկանդվածություն»:
Ըստ նրա, եթե իշխանության լինեն մարդիկ, որոնք չունենան այդ կաշկանդվածությունը եւ ունենան քաղաքական կամք, դա կբացահայտեն, ընդ որում, նախարարը վստահ է՝ 1 օրը դրա համար բավարար է:
Խոսելով Մարտի 1-ի մասին՝ նա ասել էր. «Այնտեղ պայքարի ելածները դուրս չէին եկել հանուն անձի կամ անձերի, մենք փորձում էինք շտկել, ուղղել մի բան, ոը մեզ չէր հաջողվել ավարտին հասցնել 96-ի սեպտեմբերին: Ընդ որում, հանուն արդարության, մենք մեր հիշողությունից ամենեւին էլ չէինք հանել, թե ով էր կանգնած 96-ի այդ նույն չարաբաստիկ իրադարձությունների հետեւում…2008-ին Ազատության հրապարակում պայքարի ելածները իրենց վճռական ձայնով, ազատ մտքով ստացան բացառիկ հնարավորություն պայքարել ու ՀՀ-ին բերել առաջին անգամ այդքան ցանկալի ու սպասված իշխանափոխության ֆենոմենը:
Վստահաբար պնդում եմ, որ ժողովուրդը դուրս չէր եկել ու չէր էլ գնալու բռնության ճանապարհով: Դա, կարծում եմ, թավշյա հեղափոխության ճանապարհով, սցենարով ընթացքող մի շարժում էր, որը բոլորովին չէր մտնում ինչպես Ռոբերտ Քոչարյանի, այնպես էլ իշխանությունը նրանից ժառանգություն ստացած Սերժ Սարգսյանի ծրագրերի մեջ: Ստացվում է, որ 2008-ին ՀՀ իշխանությունը չներեց ՀՀ արժանապատիվ քաղաքացուն՝ նրա մղած ազնիվ ու համարձակ պայքարի համար ու կրակեց»:
Հռիփսիմե ՋԵԲԵՋՅԱՆ
