Դատավոր Արշակ Վարդանյանը քիչ առաջ հրապարակեց «Սասնա ծռեր» խմբի անդամներից Արամ Մանուկյանի, Հովհաննես Հարությունյանի, Թաթուլ Թամրազյանի, Արամ Հակոբյանի, Տիգրան Մանուկյանի, Արայիկ Հակոբյանի, Վարդան Գերավետյանի, Մարտիրոս Հակոբյանի, Սերգեյ Կյուրեղյանի, Գևորգ Իրիցյանի, Թորոս Թորոսյանի խափանման միջոց կալանքը փոխելու, այսինքն՝ գրավի դիմաց ազատ արձակելու միջնորդության վերաբերյալ որոշումը:
Դատարանի որոշմամբ՝ այն մերժվեց, իսկ դա նշանակում է, որ այս գործով անցնող ամբաստանյալները դատավարության ընթացքում շարունակելու են մնալ կալանքի տակ: Դատարանում լարված իրավիճակ է, քաղաքացիները վանկարկում են՝ «ամոթ»:
Պաշտպաններն էլ, ի նշան բողոքի, լքեցին նիստերի դահլիճը:
Հիշեցնենք, որ կալանքից ազատման միջնորդությունը «Սասնա ծռերի» պաշտպանները ներկայացրել էին այսօր. քննարկումը մի քանի ժամ էր տեւել: 2016թ. ՀՀ ոստիկանության ՊՊԾ գունդը գրաված «Սասնա ծռեր» խմբի անդամները մեղադրվում են մի շարք ծանր հանցագործությունների, այդ թվում՝ սպանությունների, շենք-շինություն զավթելու, պատանդառության համար:
Ամբաստանյալների մի մասը (ոչ դատավոր Վարդանյանի վարույթում գտնվողները) մեղադրվում են «ծռերին» օժանդակելու համար:
Հավելենք՝ վերջերս փոխվեց ընդդիմադիր քաղաքական գործիչ՝ «Սասնա ծռերին» միանալու փորձի համար մեղադրվող Անդրիաս Ղուկասյանի խափանման միջոցը. նա ազատվեց եւ այսուհետ նիստերին չի ներկայանա կալանավորվածի կարգավիճակում:
Լուիզա ՍՈՒՔԻԱՍՅԱՆ
