Այսօր կառավարության նիստը դռնբաց էր: Նիստից հետո վարչապետ Նիկոլ Փաշինյանը լրագրողների հետ ճեպազրույցում կառավարությունում նոր նշանակումների մասին ասաց, որ համաձայնության կառավարություն են ձեւավորելու, Դավիթ Տոնոյանին այսօր նշանակելու է պաշտպանության նախարարի պաշտոնում, իսկ Սփյուռքի նախարար Հրանուշ Հակոբյանը չի շարունակելու պաշտոնավարել:
«Մենք կադրային լավագույն լուծումները պետք է գտնենք, «Ծառուկյան» դաշինքը ներգրավված կլինի կառավարությունում»,-ասաց Փաշինյանը:
Արձագանքելով՝ ՀՀ առաջին նախագահ Լեւոն Տեր-Պետրոսյանի այն հայտարարությանը, որ վարչապետը հանրային ճնշման արդյունքում չի կարողանա ԱԺ-ում օրենքներ փոփոխի, Փաշինյանն ասաց. «Քանի դեռ կա հանրային աջակցություն, դա լիարժեք կօգտագործվի երկրի զարգացման նպատակով: Որ պահին չի լինի հանրային աջակցություն, այդ պահին ես կդադարեմ լինել Հայաստանի Հանրապետության վարչապետ»:
Մանրամասն՝ տեսանյութում
ԱԺ արտահերթ ընտրությունների մասին Փաշինյանն ասաց, որ դա պետք է արվի հնարավորինս սեղմ, բայց տրամաբանական ժամկետում:
Aravot.am-ի հարցին՝ ո՞րն է այդ հնարավորությունը, արդյոք Փաշինյանը մտադիր է ԱԺ-ում տապալել կառավարության ծրագրի ընդունումը, վարչապետը պատասխանեց.«Ոչ, մտադիր չեմ»:
Մեր ճշտող հարցին՝ այդ դեպքում ի՞նչ իրավական հիմքով պետք է արտահերթ ընտրությունները լինեն, այնուամենայնիվ, ՀՀԿ-ն չի ուզում արտահերթ ընտրություններ լինեն, Փաշինյանն այսպես պատասխանեց. «ՀՀԿ-ն չի ուզում… որոշումները կայացնում է հանրությունը»:
Մանրամասն՝ տեսանյութում
Նելլի ԲԱԲԱՅԱՆ
