Միջազգային էներգետիկ գործակալությունը (ՄԷԳ) ապրիլի 24-ին Վիեննայում համախմբել էր Արևելյան գործընկերության և Կենտրոնական Ասիայի 11 երկրի կառավարությունների ներկայացուցիչների ու փորձագետների՝ մասնակցելու «ԵՄ-ն էներգետիկայի համար» նախաձեռնության էներգիայի վերականգնվող աղբյուրների ոլորտում քաղաքականության վերաբերյալ 5-րդ ֆորումին:
Արևելյան գործընկերության և Կենտրոնական Ասիայի երկրներում բիոէներգիայի ներուժը, ընդհանուր առմամբ, շարունակում է մնալ թերօգտագործված, իսկ ջերմային էներգիայի արտադրության համար հանածո վառելիքից կախվածությունը մեծ է: Վրաստանում գյուղաբնակ տնային տնտեսությունների 90%-ը կախված է փայտից, որը, ընդհանուր առմամբ, շատ անարդյունավետ էներգիայի աղբյուր է: Մինչդեռ, Ուկրաինայում էներգետիկ անվտանգությունը դարձել է կենտրոնացված ջեռուցման ոլորտում բիոէներգիայի ներդրման հիմնական շարժառիթը: Մոլդովայում բիոէներգիան, շնորհիվ ԵՄ-ի կողմից աջակցվող ծրագրերի, նույնպես կարևոր դեր է խաղում էներգիայի ներմուծումից կախվածության նվազեցման գործում:
Շատ երկրներ համաձայնվեցին, որ իրենք ունեն բիոէներգիայի ընդլայնման որոշակի ներուժ, որն արտադրվում է տարբեր գյուղատնտեսական մնացորդներից, ինչպիսիք են՝ ծղոտը, գոմաղբը և բամբակի ցողունները: «ԵՄ-ն հանուն էներգետիկայի» ծրագրի շրջանակում ՄԷԳ-ը կաշխատի 11 երկրի հետ` ուսումնասիրելով, թե ինչպես կարող է զարգանալ բիոէներգետիկայի ոլորտը և ինչպես կարելի է սկսել օգտագործել էներգիայի այլ վերականգնվող աղբյուրները:
Եվրոպական Հանձնաժողովի և Բիոէներգետիկայի եվրոպական ասոցիացիաների ներկայացումները, ինչպես նաև մի քանի երկրների թեմատիկ ուսումնասիրությունները հասանելի են ներբեռնման համար:
Միջոցառումը մասն էր Եվրոպական Միության «ԵՄ-ն էներգետիկայի համար» ծրագրի: Միջազգային էներգետիկ գործակալությունը ղեկավարում է «ԵՄ-ն էներգետիկայի համար» ծրագրի իրականացման ընթացքը Արևելյան գործընկերության և Կենտրոնական Ասիայի հետևյալ երկրներում. Հայաստան, Ադրբեջան, Բելառուս, Վրաստան, Ղազախստան, Ղրղզստան, Մոլդովայի Հանրապետություն, Տաջիկստան, Թուրքմենստան, Ուկրաինա և Ուզբեկստան: Ծրագրի նպատակն է աշխատել 11 շահագրգիռ երկրների հետ էներգետիկ տվյալների հնարավորությունների բարելավման և տվյալների հավաքագրման ու վերահսկողության ընդլայնման ուղղությամբ, ինչպես նաև աջակցել նրանց, երկրի կարիքներին համապատասխան, ապացույցների վրա հիմնված էներգետիկ քաղաքականության նախագծմանը:
EU NEIGHBOURS east
