Իրանագետ Էմմա Բեգիջանյանը կարծում է, որ Հայաստանը բարդ արտաքին մարտահրավերների առջեւ է կանգնած: Այսօր Միջազգային եւ անվտանգության հարցերի հայկական ինստիտուտի կազմակերպած «Հայաստանը թավշյա հեղափոխությանից հետո» թեմայով քննարկման ժամանակ վերլուծաբանը կարծիք հայտնեց, որ ՀՀ վարչապետ Նիկոլ Փաշինյանն ընկալվում էր իբրեւ արեւմտամետ, ուստի ՌԴ-ն զգուշավոր է լինելու եւ ռուսական շրջանակները արդեն իսկ խոսում են այդ մասին: Այս իմաստով, ըստ նրա, ԵԱՏՄ-ում եւ ՀԱՊԿ-ում շատ կարեւոր գործ կա անելու:
Վերլուծաբանը կարեւորում է մայիսի 14-ին Սոչիում կայանալիք Պուտին-Փաշինյան հանդիպումը, որից հետո շատ բան հայտնի կլինի:
Հիշեցնենք, մայիսի 14-ին Սոչիում կայանալու է Եվրասիական բարձրագույն տնտեսական խորհրդի նիստը, որին մասնակցելու է նաեւ ՀՀ նորընտիր վարչապետ Նիկոլ Փաշինյանը:
Հայաստանի արտաքին կարեւորագույն ուղղություններից մեկի`Իրանի հետ, ըստ վերլուծաբանի, փոխհարաբերությունները ոչ թե պետք է բարելավել, այլ նոր հարաբերություններ ստեղծել, քանի որ իրականում հարաբերություններ չկան: Նա ուշագրավ է համարում, որ Իրանի դեմ միջազգային պատժամիջոցների վերացումից հետո, հայ-իրանական հարաբերությունները հետընթաց ապրեցին, մինչդեռ Ադրբեջան-Իրան հարաբերություններում առաջընթաց գրանցվեց: Հիմա, երբ ԱՄՆ-ը նոր պատժամիջոցներ է սպառնում սահմանել Իրանի նկատմամբ, իրանագետի կարծիքով, Հայաստանի համար նոր հնարավորություններ են բացվում:
Նելլի ԳՐԻԳՈՐՅԱՆ
