Հայաստանի իշխանությունը աննախադեպ լեգիտիմության պաշար ունի եւ ներսում, եւ դրսում, սա թույլ է տալիս ենթադրել, որ Հայաստանը Արցախի հարցի բանակցություններում ավելի կոշտ դիրքերից կարող է հանդես գալ: Այսօր Միջազգային եւ անվտանգության հարցերի հայկական ինստիտուտում կազմակերպված «Հայաստանը թավշյա հեղափոխությունից հետո» թեմայով քննարկման ժամանակ կարծիք հայտնեց քաղաքագետ Արմեն Վարդանյանը:
Փորձագետը բավական ուշագրավ է համարում ՌԴ նախագահ Վլադիմիր Պուտինի, ԱՄՆ պետդեպի եւ ԵՄ ներկայացուցիչ Ֆեդերիկա Մոգերինիի շնորհավորանքները ՀՀ նոր վարչապետ Նիկոլ Փաշինյանին:
Բայց որ քաղաքական ճգնաժամը Հայաստանում դեռեւս չի լուծվել, քաղաքագետը միանշանակ է համարում: Նա ժողովրդավարական պետությունների համար աննախադեպ է համարում մեր երկրում ստեղծված իրավիճակը`փոքրամասնության կառավարություն: Ասում է`սա նման չէ բազմակուսակցական համակարգ ունեցող երկրների փորձին: ՀՀԿ-ն ունի մեծամասնություն, բայց իշխանությունը փոքրամասնության ձեռքում է: ՀՀԿ-ականները չեն էլ թաքցնում, որ տորպեդահարելու են նոր կառավարության գործունեությունը: Ելքը, նա տեսնում է արտահերթ խորհրդարանական ընտրություններում:
Նիկոլ Փաշինյանի կառավարության ներքին մարտահրավերը նա համարում է մենաշնորհների վերացումը: Իսկ արտաքին մարտահրավերը`Արցախի հարցը: Քաղաքագետը կարեւոր է համարում Նիկոլ Փաշինյանի հայտարարությունը`Արցախին բանակցությունների սեղան վերադարձնելու մասին. «Փորձում է սրբագրել Ռոբերտ Քոչարյանի սխալը»:
Այլ մանրամասները`տեսանյութում
Նելլի ԳՐԻԳՈՐՅԱՆ
