Aravot.am-ը Հովհ. Թումանյանի թանգարանի տնօրեն Նարինե Թուխիկյանից հետաքրքրվեց` ինչպե՞ս է վերաբերվում մշակույթի նախարարի հնարավոր թեկնածուների անունների կողքին իր անվան շրջանառվելուն:
Տիկին Թուխիկյանն ասաց, որ սոցցանցերում չկա եւ չի լսել այդ մասին: Ապա հավելեց. «Չէ, չէ… նման բան չկա, դա բացառվում է: Դա իմ գործը չէ: Դա որոշակի հմտություններ պահանջող մի բան է` եւ կառավարչական, եւ այլ…Իմ պարագայում երբեք չի լինի նման բան: Մենք ընտանեկան այլ ծրագրեր ունենք, անկեղծ ասած: Եվ երբ շուտով լրանա թանգարանի իմ պայմանագիրը, ես այն չեմ թարմացնի եւ չեմ մասնակցի մրցույթի: Ես ուրիշ ծրագրեր ունեմ, որոնք էլի մշակույթի հետ են կապված: Ես մեծագույն սիրով կաջակցեմ նոր նախարարին, մանավանդ, որ Թումանյանը նախանշած բաներ ունի, սիրով դա կփոխանցեմ, բայց պաշտոնի ստանձնումը բացառվում է»:
Ինչ վերաբերում է թումանյանական ծրագրերին, տիկին Թուխիկյանը նշեց. «Երաշխավորը եւ պարտավորություն ստանձնողն, անշուշտ, Հայաստանն է, իսկ ընդհանրապես աշխարհասփյուռ հայկական հետքի մասին է գրել Թումանյանը եւ կոնկրետ քայլեր է նախանշել: Պարզապես իր մոտ չստացվեց, թեեւ սկսել էր, բայց բոլշեւիկյան հեղափոխությունը, պատերազմը եղավ, Ցեղասպանություն եւ այլն: Եվ երբ Հայաստանն անկախ էր, ինքը շատ հիվանդ էր, ուղղակի ֆիզիկապես չհասցրեց, բայց ինչ-ինչ մոդուլներ արդեն տվել է թղթի վրա, իր պատկերացումների մասին գրել է Թումանյանը: Դրանք պետք չէ կուրորեն վերցնել, բայց կարելի է կիրառել իբրեւ հուշումներ ապագա նախարարին կամ մշակույթով զբաղվողին»:
Մեր զրույցի ընթացքում մշակույթի նախարարության ներկայիս վիճակին էլ անդրադարձ եղավ:
«Գուցե մտածեն, որ մշակույթի նախարարություն իսկապես հիմա պետք չէ, որովհետեւ այն վիճակում, որ այն կա, ոչնչի չբերող, ոչ մի հարց չլուծող, բյուջեն քամող մի կառույց է… Գուցե մտածվի այլ կառույցներ ստեղծելու, ապակենտրոն ինչ-որ բաներ անելու մասին, սրանք հարցեր են, որ պետք է քննարկվեն գիտակ մարդկանց շրջանակում, հետո պետք է աշխարհի փորձը հաշվի առնվի: Մի բան հստակ է` ես միլիոն տոկոս կարող եմ ասել, որ այն վիճակով, ինչպես մինչեւ հիմա նախարարությունը եղել է իբրեւ կառույց, դա անաշխատունակ, անիմաստ ուռճացված մի բան է, որը ոչ մի առաջադիմության մեջ չի կարող տեղավորվել»,-հայտնեց Հովհ, Թումանյանի թանգարանի տնօրենը:
Տիկին Թուխիկյանը զրույցի վերջում էլ կրկին շեշտեց, որ եթե իրեն առաջարկ արվի, ինքը երբեք չի ընդունի:
Գոհար ՀԱԿՈԲՅԱՆ
