Կոստանյանը Լեւոն Տեր-Պետրոսյանի տեսակետն է պաշտպանում ՀՅԴ-ի հարցով

Գեւորգ Կոստանյանն ու Վահրամ Բաղդասարյանը կարծում են, որ
հակասահմանադրական է պահանջել պատգամավորին մանդատը վայր դնել

Առաջին նախագահ Լեւոն Տեր-Պետրոսյանը կարծում է, որ ՀՅԴ-ն Սահմանադրություն է խախտել՝ պահանջելով Աղվան Վարդանյանին մանդատը վայր դնել: ՀՅԴ խմբակցության ղեկավար Արմեն Ռուստամյանն էլ զարմացած է, թե ինչո՞ւ է ակտիվացել առաջին նախագահը ու հատկապես՝ Աղվան Վարդանյանի հարցով: Ռուստամյանը «Առավոտի» հետ զրույցում ասաց. «Ով ՀՅԴ-ի ավանդույթներից ընկնում է ցնցումների մեջ, բնական է՝ պիտի այդպիսի ահազանգ տար: Ի՞նչ է նշանակում՝ թքած ունեն Սահմանադրության վրա, այստեղ որեւէ սահմանադրական խախտում չկա, թող բացատրեն՝ ո՞րն է խախտումը»: Մեր դիտարկմանը, որ Լեւոն Տեր-Պետրոսյանը վկայակոչում է Սահմանադրության 94-րդ հոդվածը, իսկ դուք պահանջում եք պատգամավորին մանդատը վայր դնել, Ռուստամյանն արձագանքեց. «Այո, պահանջում ենք, իսկ պահանջը հակասահմանադրակա՞ն է: Այսինքն՝ որեւէ մեկը, որ պահանջում է այսինչ տնօրենը կամ որեւէ մեկը հրաժարական տա, դա հակասահմանադրակա՞ն է: Այո, մենք պահանջել ենք, բայց որեւէ պարտադրանք չենք դրել: Շատ ճի՛շտ ենք արել, որովհետեւ ով էլ լինի՝ ուզում է Աղվան Վարդանյանը լինի, ուզում է ես լինեմ, խմբակցության մեջ ենք հայտնվել կուսակցության բերած ձայներով, այդ ցանկով ենք մենք քվեարկվել, ինչի՞ մասին է խոսքը: Ընդհակառակը՝ մենք հետագայում աշխատելու ենք նրա վրա, որ հետ կանչելու ինստիտուտը վերականգնվի: Ի՞նչն է սրա հակասահմանադրական, շատ երկրներ կան, որ հետ են կանչում: Աղվան Վարդանյանը շարժվել է Սահմանադրությամբ՝ իր համոզումով է քվեարկել, իր խղճով էլ վայր է դրել մանդատը, մենք էլ ասել ենք՝ սա բնական է, որովհետեւ սա ՀՅԴ-ն է, կուռ է, մենք չենք կարող տրոհվել, մասնատվել: Շատերի երազանքն է դա, դրա համար էլ չեն ուզում այդ ավանդույթը տեսնել, էդքան բան»:

Ուշագրավ է, որ ՀՀԿ խմբակցության պատգամավոր, նախկին գլխավոր դատախազ Գեւորգ Կոստանյանը կարծում է, որ Լեւոն Տեր-Պետրոսյանը ճիշտ է՝ հակասահմանադրական է պահանջել պատգամավորին մանդատը վայր դնել. «Իհարկե, մենք չունենք նման կարգավորում, չունենք հրամայական մանդատ, մեր Սահմանադրությունն արդեն այդ հարցի պատասխանը տվել է, որ պատգամավորի մանդատը հրամայական չի, այլ ազատ մանդատ է: Այսինքն՝ թեեւ դու խմբակցության անդամ ես, դու կարող ես քվեարկել ինչպես ուզում ես: Սա արդեն կուսակցական կարգապահության խնդիր է, ոչ թե սահմանադրական: Պատգամավորն իրավունք ունի ցանկացած դեպքում քվեարկել այնպես, ինչպես ինքն է համոզվում, բայց դա կարող է հանգեցնել իրավական հետեւանքների, օրինակ՝ խմբակցության կազմից նրան հանելով: Նա կարող է մնալ ազատ պատգամավորի կարգավիճակով՝ չմտնելով որեւէ այլ խմբակցություն»:

Մենք հարցրինք՝ այսինքն՝ Լեւոն Տեր-Պետրոսյանը ճի՞շտ էր՝ ասելով, որ հակասահմանադրական է, Կոստանյանը պատասխանեց՝ «Իհարկե, միանշանակ»: Մեր դիտարկմանը, որ որոշ սահմանադրագետներ բացատրում են, որ քանի որ մեծամասնական ընտրակարգը վերացել է, պատգամավորները կուսակցական ցանկով են ընտրվում, հետեւաբար իր մանդատն արդեն ենթարկվում է կուսակցությանը, Կոստանյանը արձագանքեց. «Չէ, նման կարգավորում չկա: Սահմանադրագետը երեւի նման հետեւություն է անում, բայց մի սահմանադրագետ էլ ես եմ»:

«Ելքի» պատգամավոր Էդմոն Մարուքյանը մեզ հետ զրույցում այս առնչությամբ ասաց. «Սահմանադրությունն ասում է, որ պատգամավորն առաջնորդվում է իր խղճով եւ համոզմունքներով: Տվյալ պարագայում պատգամավորը՝ Աղվան Վարդանյանը, ասում է, որ ես իմ խղճով ու համոզմունքներով եմ առաջնորդվել, բայց մյուս կողմից՝ կա նաեւ կուսակցական կարգապահություն, կուսակցական պահանջ, եւ մարդը կարող է ենթարկվել այդ պահանջին, կարող է նաեւ չենթարկվել: ՀՅԴ Գերագույն մարմինը պահանջել է, որ նա մանդատը վայր դնի, եւ Աղվան Վարդանյանը, որպես կուսակցական, այդ պահանջը կատարել է: Հետեւաբար ես չեմ կարող ասել, որ մենք ունենք խնդիր: Եթե նա մանդատը վայր չդներ, որեւէ մեկը չէր կարող պարտադրել: Ինքը որոշել է, իր մանդատը վայր է դրել, որ չդներ՝ ի՞նչ էր անելու կուսակցությունը՝ ոչ մի բան: Ոչ մի մեխանիզմ չկա: Եթե, ասենք, ճնշեին նրան կուսակցական որոշումով, նա կարող էր կուսակցությունից դուրս գալ, բայց մանդատը վայր չդներ»:

ՀՀԿ խմբակցության ղեկավար Վահրամ Բաղդասարյանն ասաց, որ երբ առաջին անգամ Ֆելիքս Ցոլակյանից իմացան, որ կողմ է ուզում քվեարկել Նիկոլ Փաշինյանին, անակնկալի եկան, բայց անգամ այդ դեպքում չեն մտածել խմբակցության անունից պահանջ ներկայացնել, որ Ցոլակյանը վայր դնի մանդատը. «Բացարձակապես չէինք անի: Իհարկե, դա հակասահմանադրական է: Դա ինքը պետք է որոշի, մենք նման հարց չենք բարձրացնում եւ իրավունք չունենք պարզապես բարձրացնելու»:

ՀՌԻՓՍԻՄԵ ՋԵԲԵՋՅԱՆ

«Առավոտ»

09.05.2018