Այսօր պաշտպանության նախարարությունում տեղի ունեցած ասուլիսում, պաշտպանության նախարարի պաշտոնակատար Վիգեն Սարգսյանից հետաքրքրվեցին, թե ինչ եղավ ցույցերին միացած պայմանագրային զինծառայողների ճակատագիրը:
Ի պատասխան պարոն Սարգսյանն ասաց, որ այդ հարցն ունի օրենսդրական պատասխան. «Առաջինը զինվորական համազգեստով անձանց մասնակցությունը քաղաքացիական ցույցերին անթույլատրելի է, վերջակետ: Ապագա պաշտպանության նախարարին, անկախ նրանից ով կլինի եւ որքանով նրա սրտով կլինի՝ այն ինչ տեղի է ունեցել, հորդորում եմ շատ կոշտ արձագանքել՝ ծառայողական քննության լիարժեք ավարտից հետո: Ես՝ իմ մասով ընդունել եմ զորամասի հրամանատարի հրաժարականի դիմումը զորացրման, ուղարկել եմ այն համապատասխան խողովակներով կառավարություն, որտեղից էլ ուղարկվել է հանրապետության նախագահի հաստատմանը: Նախագահն ըստ Սահմանադրության, պետք է ձեռնարկի իրավական քայլ՝ համապատասխան կարգավորումով: Ցավով եմ դա արել, որովհետեւ այդ զորամասի հրամանատարն ինձ համար շատ հարգված, շատ ընդունելի սպա եւ զինծառայող է, բայց հասկանում եմ իր զեկուցագրի իմաստը, կիսում եմ, ինքս կանեի առնվազն նույնը»:
Վիգեն Սարգսյանն ասաց, որ զինված ուժերում այդ արարքը շատ վատ է գնահատվել եւ վատ արձագանք է ստացել:
Լուսինե ԲՈՒԴԱՂՅԱՆ
