«Իմ քայլը» համաժողովրդական շարժումը ցույց տվեց, որ ՀՀ-ում բոլոր փոքր ու մեծ պայքարների ոչ մի զոհ, ոչ մի ազատազրկում եւ ոչ մի կորուստ անհետեւանք չեն եղել:
ՀՀ վարչապետի թեկնածու Նիկոլ Փաշինյանի ելույթից հետո նման համոզմունք հայտնեց «Ելք» դաշինքի պատգամավոր Լենա Նազարյանը: Իր ելույթում նա մատնանշեց. «Հիշենք «Էլեկտրիկ Երեւանը», «Թեղուտը», «Թռչկանը», որոնք փորձ էին: Դրանք վերածվեցին փորձի եւ մարտավարության»:
Նազարյանի խոսքով՝ «Իմ քայլը» ժողովրդական շարժման շնորհիվ «ազատագրվեց» ոստիկանը. «Նա այլեւս չստիպված չի լինի կատարել ապօրինի հրամաններ: Ազատագրվեց դպրոցի տնօրենը, որն այլեւս ստիպված չի լինի ուսուցիչներին ստիպել ձայներ հավաքագրել ընտրությունների ժամանակ: Ազատագրվեց նաեւ համայնքի ղեկավարը, որն այլեւս ստիպված չի լինելու լինել կուսակցական այն բանի համար, որ մարզպետն իր համայնքին լավ աչքով նայի: Ազատագրվեցին հուսահատության կապանքներում գտնվողները»:
Լենա Նազարյանը համոզմունք հայտնեց, որ ժողովրդական շարժումը դեռ շատ անելիքներ ունի. «Ընտրատեղամասերում չպետք է լինի ընտրակեղծարարություն, իսկ բուհերում՝ կուսակցականացում: Հեղափոխությունը պետք է շարունակվի եւ ավելի մեծ թափ առնի»:
Լուիզա ՍՈՒՔԻԱՍՅԱՆ
