«Սահակ հեռացիր. պահանջում ենք բուհը ծնկի բերողի հրաժարականը». ցուցարարների մեջ էր նաև Անահիտ Ֆարմանյանը (Տեսանյութ, ֆոտոշարք)

Այսօր ևս լարված իրավիճակ էր Շիրակի պետական համալսարանի մուտքի մոտ. աշխատանքից հեռացված դասախոսներն ու մի խումբ ուսանողներ պահանջում էին բուհի ռեկտոր Սահակ Մինասյանի հրաժարականը:

Այսօր ցուցարարներին միացել էր նաև երեք օր առաջ աշխատանքից հեռացված պրոռեկտորը՝ Անահիտ Ֆարմանյանը, որը ելույթ ունեցավ՝ մեղադրելով ռեկտորին բուհը քարուքանդ անելու, ծնկի բերելու մեջ: Նա վստահեցրեց՝ եթե ոչ այսօր, ապա վաղը պարոն ռեկտորը հեռանալու է: Մինչդեռ, ըստ նրա, ամեն օրը բուհի համար թանկ է: Նա նաև քննադատեց ՀՀԿ-ական ռեկտորին՝ կրթության ոլորտում առկա օրենքներին չտիրապետելու, բուհի կանոնադրությանը ծանոթ չլինելու համար:

«Մենք այդքան ժամանակ չունենք սպասելու, թե երբ կհասկանաք օրենքով գործելու կարևորությունը, երբ կփորձեք ծառայել հասարակությանը, պաշտոնը կօգտագործեք մարդկանց պատժելու և բյուջեն ու մարդկանց գրպանները թալանելու համար: Որքան երկար ձգվի ձեր հրաժարականն, այնքան երկար ենք բարձրաձայնելու կատարվածները», -ասաց Անահիտ Ֆարմանյանը: Նա ներկաներին հավաստիացրեց, որ բուհի դասախոսական կազմի զգալի մասը միացել է իրենց, պարզապես բուհում այժմ տոտալ վախի մթնոլորտ է:

Անահիտ Ֆարմանյանը նաև ասաց, որ պարոն Մինասյանը իր սովորության համաձայն, կսկսի ստորագրահավաք ու հորդորեց չվախենալ ու չստորագրել:

«Նա պետք է պատասխանատվության ենթարկվի բուհը պրիմիտիվորեն թալանելու համար: Նա հետ է վերադարձնելու գողոնը», -հայտարարեց Անահիտ Ֆարմանյանը:

Այնուհետ փաստաթղթերը ձեռքին՝ ելույթ ունեցավ աշխատանքից հեռացված դասախոս Գագիկ Համբարյանը, որը մեկ անգամ ևս խոսեց 7 ամիս շարունակ իր կողմից բարձրաձայնած այն չարաշահումների մասին, որը ըստ նրա, թույլ է տվել Սահակ Մինասյանը:

«Էսօր շատ ուրախալի իրադարձություն տեղի ունեցավ, իմացա, որ ոստիկանությունը, եթե այդ մասին հայտարարվի, քրեական գործ կհարուցի: Հետաքրքիր էր՝ 7 ամիս ով էր խանգարում ոստիկանությանը կամ դատախազությանը, որ քրեական գործ հարուցեին իմ հայտարարությունների հիման վրա»,- ասաց Գագիկ Համբարյանը:

Գագիկ Համբարյանը նաև հայտարարեց, թե Սահակ Մինասյանն ասել է, որ ինքը մոտ է Սասուն Միքայելյանի հետ: Նա անդրադարձավ նաև բուհում Սահակ Մինասյանի կողմնակիցների «աստղաբաշխական աշխատավարձեր» ստանալուն՝ նշելով, որ հենց այդ պատճառով էլ նրանք «դոշ են տալիս պարոն Մինասյանի համար»:

Ըստ Գագիկ Համբարյանի, Սահակ Մինասյանի աշխատավարձը 795 հազար դրամ է, ամենաբարձր աշխատավարձերից մեկը ՀՀ կրթական ոլորտում:

«Երևանի պետական համալսարանը, որն ունի 20 հազար ուսանող, ռեկտորը վճարվում է ընդամենը 700 հազար դրամ, պարոն Մինասյանը, որն ունի ընդամենը երկուս ու կես հազար ուսանող և ղեկավարում է Հայաստանի ամենաաղքատ մարզի մայր բուհը, ստանում է 795 հազար դրամ աշխատավարձ, սա ինչ է, եթե ոչ կոռուպցիա, սա օրինականացված կոռուպցիա է»:

Ելույթ ունեցավ նաև բուհից հեռացված 40 տարվա դասախոս Սամվել Մաթևոսյանը, որը հայտարարեց, որ իրեն Ֆիզդաստիարակության ամբիոնից հեռացրել են, քանի որ ընտրություններում աշխատել է ԲՀԿ կուսակցության կողմից հանձնաժողովում:

Ցուցարարները մտան բուհի շենք՝ պահանջելով Սահակ Մինասյանի հրաժարականը:

Սահակ Մինասյանը ևս հանդես եկավ մամուլի ասուլիսով՝ մանրամասն պատասխանելով իրեն հասցեագրված բոլոր մեղադրանքներին:

Նունե ԱՐԵՎՇԱՏՅԱՆ