Համաժողովրդական հեղափոխության այս պահի ակնհայտ հաջողություններից, երբ իշխանափոխության գործընթացը չի ավարտվել, քաղաքագետ Ստեփան Գրիգորյանը համարում է Մոնթե Մելքոնյանի անվան դպրոցի տնօրենին ստիպելով աշխատանքից հեռացնելը, Շիրակի մանկավարժականում ընթացող գործընթացը: «Մարդիկ հասկացան, որ պետք է պայքարել սեփական իրավունքների համար`չպետք է սպասել վերեւից կարգադրանքի: Այդ ղեկավարները ուղղակի կուսակցականացնում էին այդ կրթօջախները»,- «Տեսակետ» մամուլի ակումբում հայտարարեց քաղաքագետը:
Երկրորդ ձեռքբերումը նա համարում է այն, որ Հայաստանի վարկանիշն աշխարհում շատ բարձրացավ: Ցավում է, որ եղան պատվեր կատարող փորձագետներ, որոնք փորձում էին նսեմացնել շարժումը եւ հայ ժողովրդի վաստակը:
Քաղաքագետը վաղը խորհրդարանում կայանալիք վարչապետի ընտրության երկրորդ փուլի քվեարկությանն ընդառաջ՝ հուսով է, որ ՀՀԿ-ի պատգամավորները հասկացան իրավիճակի լրջությունը, մայիսի 2-ի ընդվզումից դասեր քաղել են: «Կարծում եմ, որ վաղը չքվեարկելով`իրենք դուրս կգան ժողովրդի դեմ եւ այդտեղ ոչ ոք իրենց չի փրկի: Եթե ՀՀԿ-ն վաղը քվեարկի Նիկոլ Փաշինյանի օգտին, որպես քաղաքական ուժ`շանս կունենա քաղաքական ասպարեզում մնալ»,-ասաց քաղաքագետը:
Ստեփան Գրիգորյանի կարծիքով, Նիկոլ Փաշինյանը երեք կարեւոր բան պետք է անի. բոլոր քաղբանտարկյալների ազատում, ԸՕ-ի արագ փոփոխություններ, ռեյտինգային համակարգի հանում, 2-3 ամսում արտահերթ ընտրությունների անցկացում:
Մանրամասները`տեսանյութում
Aravot.am-ի հարցին`բոլոր քաղբանտարկյալներ ասելով նկատի ունի նաեւ «Սասնա ծռերին» եւ Ժիրայր Սեֆիլյանին, Ստեփան Գրիգորյանը պատասխանեց. «Փակագծերը կբացեմ Նիկոլ Փաշինյանի ընտրվելուց հետո, բայց բոլոր քաղբանտարկյալները պետք է ազատվեն, քանի որ իշխանությունը լուրջ մեղք ուներ նրանում, որ թույլ չէր տալիս իշխանափոխություն`ազատ ընտրությամբ: Դա կարող է առանձին մարդկանց ռադիկալիզացումը բացատրել»:
Իսկ Սամվել Բաբայանի մասով քաղաքագետը վերապահում ունի, քանի որ անգամ այն ուժը`ՕՐՕ դաշինքը, որի հետ Սամվել Բաբայանը մասնակցեց անցած տարի կայացած խորհրդարանական ընտրություններին, նրան քաղբանտարկյալ չի համարում:
Այլ մանրամասները`տեսանյութում
Քաղաքագետը կարծում է, որ ընտրությունները պետք է արագ անցկացվեն, քանի որ այս վերելքի ժամանակ մարդիկ ակտիվ են եւ սպասելիքները այլ, ու անգամ մարդիկ, ովքեր նախկինում հակված էին փող վերցնել, հիմա չեն վերցնի:
Նելլի ԳՐԻԳՈՐՅԱՆ
