«Առավոտ»-ի հետ զրույցում անդրադառնալով ՀՀԿ փոխնախագահ Արմեն Աշոտյանի՝ Associated Press-ին երեկ տված մեկնաբանությանը, թե՝ «եթե Նիկոլ Փաշինյանը դառնա վարչապետ, ապա ՀՀԿ-ն կդառնա ընդդիմություն», «Քաղաքացիական պայմանագիր» կուսակցության անդամ Արայիկ Հարությունյանն ասաց. «Սպասենք պաշտոնական հայտարարության, որովհետեւ դա գուցե Արմեն Աշոտյանի անձնական մոտեցումն է: ՀՀԿ-ից պատգամավորներ կան, որոնք ասում են, թե մայիսի ութին Նիկոլ Փաշինյանին «կողմ» են քվեարկելու: Պարզ է, որ միասնական դիրքորոշում չունեն եւ գուցե՝ ընդդիմություն լինելու հարցի շուրջ էլ չունեն»:
Ինչ վերաբերում է Արմեն Աշոտյանի դիտարկմանը, թե «Նիկոլ Փաշինյանի գլխավորած կառավարության հետ համագործակցության եզրեր չի տեսնում», Արայիկ Հարությունյանը նշեց. «Դա եւս գուցե պարոն Աշոտյանի անձնական կարծիքն է: ՀՀԿ խմբակցության ղեկավար Վահրամ Բաղդասարյանը նման հայտարարություն չի արել: Սպասենք ՀՀԿ-ի պաշտոնական դիրքորոշմանը, որը, թերեւս, կհնչի մայիսի 8-ին»: Մեր զրուցակիցը հավելեց, որ իրենց նպատակն է ունենալ ժամանակավոր կառավարություն, որը կարտացոլի տվյալ պահի իրողությունները. «Իսկ թե ՀՀԿ-ն ինչ որոշում կկայացնի, արդեն իրենց ներքին խնդիրն է»:
ԼՈՒԻԶԱ ՍՈՒՔԻԱՍՅԱՆ
«Առավոտ»
05.05.2018
