Շիրակի մարզի Սառնաղբյուր գյուղում սկսվել է ստորագրահավաք՝ ընդդեմ Անի համայնքի ղեկավար, ՀՀԿ-ական Արտակ Գևորգյանի։ Այս մասին Aravot.am-ին տեղեկացրեց Սառնաղբյուր գյուղի բնակիչ Մնաց Ալեքսանյանն՝ ասելով, որ կազմակերպիչն ինքն է ու արդեն իսկ մոտ 800-ին հասնող ստորագրություններ կան։
Նա իր ՖԲ էջում նաև հայտարարություն է տեղադրել, որտեղ գրված է․ «Անվստահություն ենք հայտնում համայնքի ղեկավար Արտակ Գևորգյանին՝ իր պաշտոնական լիազորությունները ոչ ճիշտ և անհետևողական կատարելու և չկատարելու համար։ Սառնաղբյուր համայնքում չեն վստահում մինչ օրս նրա ներկայացրած և ոչ մի պլանի և անձնապես հենց իրեն՝ որպես համայնքի ղեկավարի։
Նա չի կատարել Սառնաղբյուր համայնքին վերաբերվող իր հաշվետվություններում նշված գործողությունները ,մինչ օրս դեռ քանդուքարափ է Սառնաղբյուր -Մարալիկ ճանապարհը։
Այս և այլ բնույթի թերություններով հանդերձ, ասում ենք ՝ «Ո՛չ, Արտակ Գևորգյանին»։
Վերջում հավելենք, որ Սառնաղբյուր գյուղը միացել է համաժողովրդական պայքարին,և ասում է «Ո՛չ, ՀՀԿ վարչախմբին»:
Ստորագրահավաքով սառնաղբյուրցիները ցանկանում են նաև առանձնանալ միավորված Անի համայնքից՝ նախկինի պես ունենալով առանձին համայնքապետ ու ավագանի։
Հիշեցնենք, որ Անիի տարածաշրջանի գյուղերը միավորվեցին՝ դառնալով մեկ համայնք, որի կենտրոնը Մարալիկն է, ղեկավար էլ ընտրվեց Մարալիկի քաղաքապետ Արտակ Գևորգյանը։
Նունե ԱՐԵՎՇԱՏՅԱՆ
Լուսանկարը՝ Մնաց Ալեքսանյանի ֆեյսբուքյան էջից
