Քաղաքագետ Ալեքսանդր Մանասյանի կարծիքով, Նիկոլ Փաշինյանի հայտարարությունը, թե իր՝ վարչապետ ընտրվելու պարագայում, վենդետա չի լինելու, բավարար չէ հասկանալու համար, թե նա ինչ քաղաքականություն է վարելու:
«Ինչ վերաբերում է ՀՀԿ-ին, կարծում եմ՝ առաջիկայում ՀՀԿ-ն կմտնի խրամատային պայքարի մեջ, ու կողմերը կփորձեն իրարից պոկել ինչ-որ դիրքեր առաջիկա խորհրդարանական ընտրություններում շահելու համար, ապագան ցույց կտա՝ որքանով է հաջողվում դա երկու կողմերին»,- այսօր «Հայելի» ակումբում ասաց քաղաքագետը:
Նրա խոսքով, «Քայլ արա, մերժիր Սերժին» շարժումը անկեղծ էր, բայց ժողովրդի շնորհիվ. «Եթե մի քանի հարյուր նիկոլականներ դուրս գային, շարժումն այս բնույթը չէր ընդունի, սա ղարաբաղյան շարժումը հիշեցնող գարնանային թարմությամբ ժողովրդին հավաքած շարժում էր ու իր պոտենցիալով զուտ հայկական երեւույթ լինելուց դադարել է, այն միջազգային կյանքի նշանային երեւույթ է դարձել»:
Քաղաքագետ Լեւոն Շիրինյանն էլ թավշյա հեղափոխությունը բացարձակ լեգիտիմ որակեց՝ասելով, որ այս շարժման որակը շատ բարձր է.
«3 նախագահների կառավարման տարիները՝ արտագաղթի, կողոպուտի տարիներ էին: Հիմա Հայաստանը զարգացման այլ փուլ է տեղափոխվում: Մենք շուռ ենք գալիս դեպի երկրի ներս: Մնում է , որ երկրի զարգացման կողմնորոշիչները ճիշտ ուղղորդեն:
Կլան, մաֆիա պետական ապարատի միջոցով կարելի է 2 օրում վերացնել»:
Արփինե ՍԻՄՈՆՅԱՆ
