Քաղաքագետ Միքայել Զոլյանին Հայաստանում ստեղծված նոր իրավիճակի ինտրիգները հիշեցնում են 81 թվականի դեպքերը Լեհաստանում:
«Համերաշխություն ընդդիմադիր շարժում կար, որը պարալիզացրել էր ամբողջ Լեհաստանը նման մարտավարությամբ՝ գործադուլներ եւ այլն, այդ ժամանակ Լեհաստանում տեղի ունեցավ պետական հեղաշրջում: Մի մարշալ կար, որը իշխանությունը գրավեց ու ռազմական հեղաշրջում իրականացրեց ու բացատրեց նրանով, որ եթե դա ինքը չաներ, կմտնեին խորհրդային տանկերն Արեւելքից, գերմանական տանկերը՝ Արեւմուտքից, լեհ ժողովուրդն էլ մտածեց՝ ավելի լավ է իրենց տանկերը լինեն, քան ռուսական կամ գերմանական տանկերը, բայց երբ Խորհրդային միությունը փլուզվեց, պարզվեց, որ իրականում իշխանությունը դիմել էր Բրեժնեւին, որ տանկեր լցնեն, բայց Բրեժնեւն ասել էր՝ չէ, դուք այդ հարցը լուծեք. …տպավորությունն այն է , որ Հայաստանում որոշ ուժեր փորձում են ներկայացնել, որ ՌԴ-ն իրենց մեջքին է, եթե նույնիսկ ոչինչ չանեն, ՌԴ-ն կխառնվի, բայց ՌԴ-ն շատ ավելի չեզոք էր:
Երկրի հեղափոխության առաջին փուլում այդ չեզոքությունը կարելի էր բացատրել նրանով, որ ՌԴ-ն կարծում էր, որ իշխանության կմնա ՀՀԿ-ն՝ Կարեն Կարապետյանի գլխավորությամբ, բայց, ի վերջո, հասկացան, որ կարելի է հաշտվել նաեւ Նիկոլ Փաշինյանի իշխանության հետ, որովհետեւ այլընտրանքը լրիվ անկանխատեսելի հետեւանքներ կարող է ունենալ»,- այսօր «Մեդիա կենտրոնում» ասաց քաղաքագետը:
Արփինե ՍԻՄՈՆՅԱՆ
