Երեկ համացանցում հայտնվեց մի խոսուն լուսանկար, որտեղ Շիրակի դաշնակցական մարզպետ Արթուր Խաչատրյանը, մարզպետարանի աստիճաններին ցուցարարների կողքը նստած, զրուցում էր նրանց հետ, երիտասարդներն էլ կլանված լսում էին նրան։
Այսօր մարզպետի պաշտոնից հեռանալիս` Aravot.am-ը Արթուր Խաչատրյանից հետաքրքրվեց, թե ի՞նչ էր զրուցում ցուցարարների հետ։
«Երեկ պետք է տաբելը ստորագրեինք, որ այսօր մեր ՊՈԱԿ-ները՝ մի քանի հազար հոգի աշխատավարձ ստանային։ Ժամը 15․30 կողմերն էր, երբ ես եկա, ցուցարարներից մի տաս հոգի էին մնացել։ Մուտքի դուռը բաց էր, մոտեցա իրենց, ասացի՝ տղաներ, եթե ուզենայի գաղտագողի մտնել շենք, կմտնեի։ Ես ձեզ հարգեցի, դուք էլ ինձ հարգեք։ Պետք է բարձրանամ տաբելները ստորագրեմ, տղաներից մեկն ասաց՝ եթե բարձրանաք, հետո կիջնե՞ք։ Ասի՝ կիջնեմ, բարձրացա, տաբելը ստորագրեցի, իջա ներքև, խոսում էինք տարբեր բաներից, մտերմիկ խոսակցություն էր, զրույց էր հանգիստ», -պատմեց Արթուր Խաչատրյանը։
Հիշեցնենք, որ երեկ առավոտյան ժամը 8․15-ից ցուցարարները շրջափակել էին մարզպետարանի շենքը՝ աշխատակազմին չթույլատրելով ներս մտնել։
Նունե ԱՐԵՎՇԱՏՅԱՆ
