Այսօր ՀՀ կառավարությունը ընդունել է Շիրակի դաշնակցական մարզպետ Արթուր Խաչատրյանի ապրիլի 26-ին ներկայացրած հրաժարականը։ Արթուր Խաչատրյանն այսօր, այսպես ասած, հրաժեշտի մամուլի ասուլիս էր հրավիրել՝ տեղեկացնելով, որ այսօրվանից վայր է դնում Շիրակի մարզպետի պարտականությունները։
Նա ընթերցեց մի տեքստ՝ ուղղված շիրակցիներին, որտեղ նշում է, որ իր պարտականություններն իրականացրել է՝ առաջնորդվելով բարոյականությամբ և հանրային շահի գերակայությամբ, մասնագիտական արհեստավարժության իր սկզբունքներին ու պարտականություններին համապատասխան։
«Այդ սկզբունքներին հավատարիմ մնացի մինչև վերջ։ 11 ամիս առաջ, երբ ես մարզպետ նշանակվեցի, հայտարարեցի, որ ես Շիրակի մարզ խոպան չեմ եկել։ Եկել եմ, որ համատեղ աշխատանքով մարզի վրայից կարողանանք ջնջել աղետի գոտի պիտակը, փոխել մարդկանց տրամադրությունը, ստեղծել աշխատատեղեր ու կանխել արտագաղթը։ Ունեի երկարաժամկետ բազմաթիվ ծրագրեր ու լուծելիք խնդիրներ, ինչ-որ բան հաջողվեց, ինչ-որ բան չհասցրեցի»,- ասաց մարզպետը։
Նա թվարկեց այն ծրագրերը, որոնք հաջողվել է իրագործել։ Նա նաև շնորհավորեց լրագրողներին մամուլի ազատության միջազգային օրվա հետ կապված ու առանձնահատուկ շնորհակալություն հայտնեց՝ մարզպետարանի աշխատանքը օբյեկտիվորեն լուսաբանելու համար։
«Հայաստանի համար նոր օր է բացվում, երբ չի լինում ելք ու ճար, խենթերն են գտնում հնար։ Դեռ մեկ ամիս առաջ անհնարին թվացողն արդեն իրականություն է։ Երկիրը թևակոխում է զարգացման նոր փուլ։ Հաղթանակի արդյունքները պետք է փայփայել, չթողնել, որ փոշիանան, անցյալի սխալները պետք է սերտել՝ նոր սխալներից խուսափելու համար։ Հավատում եմ մեր երկրի հզորացմանը, հավատում եմ Շիրակի մարզի ծաղկմանը։ Մի քանի օրից կվերադառնամ Երևան՝ հոգումս ու մտքումս միշտ պահելով հարազատ դարձած իմ Շիրակը։
Ուզում եմ, որ ինձ միշտ հիշեն որպես Գյումրիում հանգիստ զբոսնող, բոլորի հետ խանութներում հերթ կանգնող և երիտասարդ ցուցարարների հետ մարզպետարանի աստիճանի առաջ հանգիստ զրուցող պարզ մարդու»,- ասաց մարզպետը։
Նունե ԱՐԵՎՇԱՏՅԱՆ
