Վերահսկիչ պալատի 2017-ի տարեկան հաշվետվությունն է քննարկվում ԱԺ-ում: Հաշվեքննիչ պալատի նախագահ Լեւոն Յոլյանն ասաց, որ Սեւան ազգային պարկի, ԴԱՀԿ-ի, ՀՀ-ում տավարաբուծության զարգացման գյուղնախարարության ծրագրի մասով արձանագրություն են կազմել: «Սեւան ազգային պարկ» ՊՈԱԿ-ում իրականացրած ուսումնասիրությունների արդյունքում պաշտոնական լիազորությունները չարաշահելու եւ պաշտոնական կեղծիք փաստերի առիթով գլխավոր դատախազությունը քրեական գործ է հարուցել օրերս: Նա ասաց, որ նախաքննության գաղտնիության սկզբունքներից ելնելով՝ առայժմ զերծ կմնան առավել մանրամասն ներկայացնել, ավելի ուշ կխոսեն դրա մասին:
Յոլյանը նաեւ ասաց, որ որոշ ծրագրերի կատարողականի հետ կապված ուսումնասիրել են եւ խախտումներ գտել. «Գաղտնիք չէ, որ գյուղատնտեսության զարգացման նպատակով երկրում կա գյուղտեխնիկայի խիստ կարիք: Այդ նպատակով կառավարությունը 2015-17-ի ընթացքում 8 մարզում ստեղծել է 113 գյուղատնտեսական կոոպերատիվներ, գնել է շուրջ 2 մլրդ 100 մլն դրամի 406 միավոր գյուղտեխնիկա: Ստուգմամբ հայտնաբերվել է, որ գյուղատնտեսության նախարարությունը կոոպերատիվների կարիքներին անհրաժեշտ գյուղտեխնիկայի ուսումնասիրություն չի իրականացրել, կոոպերատիվների գործունեության եւ ստացված գույքի նպատակային շահագործման մոնիտորինգ չի իրականացրել, քիչ չեն դեպքերը, երբ ստացված տրակտորները չեն շահագործվում գյուղգործիքների բացակայության պատճառով կամ հակառակը՝ տրակտորի բացակայության պայմաններում ձեռք են բերվել միայն գյուղգործիքները: Գյուղտեխնիկայի մի մասը չի շահագործվել, իսկ օգտագործվող գյուղտեխնիկայի պարագայում աշխատել է ոչ լիարժեք ծանրաբեռնվածությամբ: Ստացված գործիքների մի մասը չի շահագործվում՝ հողատիպերին չհամապատասխանելու պատճառով եւ պահվում է բացօթյա ու ոչ պատշաճ պայմաններում»:
Հիշեցնենք, որ գյուղատնտեսության նախկին նախարար Սերգո Կարապետյանը մեծ ջանքեր էր թափում ու միջոցներ ծախսում՝ կոոպերատիվների համար, հարկ եղած դեպքում լրագրողներին ներկայացնում դա՝ որպես իր հաջողություն: Մինչդեռ այսօր արդեն Յոլյանը փաստեց, որ ճնշող մեծամասնության դեպքում այդ կոոպերատիվները ձեւական բնույթ են կրել: Փող են ծախսել, տեխնիկա գնել ու դա չի ծառայում իր նպատակին:
Յոլյանն ասաց. «Կան ծրագրեր, որտեղ կա իրավիճակը շտկելու եւ կառավարումը բարելավելու հստակ անհրաժեշտություն»:
Հռիփսիմե ՋԵԲԵՋՅԱՆ
