Ապրիլի 27-ից Մոսկվայում մեկնարկել է XV Համաշխարհային պարային օլիմպիադան, որը շարունակվելու է մինչեւ մայիսի առաջին տասնօրյակը: Օլիմպիադային, որի շրջանակում մի քանի մրցույթներ են կազմակերպվում, 45-50 երկրների թվում մասնակցում է նաեւ Հայաստանը: Մեր երկիրը ներկայացնում է երեւանյան «Նոր դար» պարային համույթի մենապարող՝ ժողովրդական պարերի աշխարհի կրկնակի չեմպիոն, Եվրոպայի չեմպիոն, 12-ամյա Գարիկ Պետրոսյանը (Հայաստանյան պատվիրակության ղեկավար՝ IDO միջազգային կարգի մրցավար Արտաշես Մեսրոպյան):
«Նոր դար» պարային համույթի ղեկավար, պարուսույց Մհեր Պետրոսյանն Aravot.am-ի հետ զրույցում պատմեց. «Օլիմպիադայի առաջին՝ «Էթնո-ֆոլկ» մրցույթում Գարիկը ներկայացավ Արա Գևորգյանի «Շուշի» ստեղծագործության, իսկ «Ժողովրդական պարերի աշխարհի առաջնություն» մրցույթում՝ Կարեն Սևակի «Հաղթանակ» ստեղծագործության ներքո: Մրցավարական կազմի որոշմամբ՝ աշխարհի կրկնակի եւ Եվրոպայի գործող չեմպիոն Գարիկ Պետրոսյանը դարձավ XV համաշխարհային պարային օլիմպիադայի ժողովրդական պարերի մրցույթի չեմպիոն: Նա կանգնեց առաջին պատվո հարթակին, եւ ՀՀ օրհներգը հնչեց արդեն 4-րդ անգամ: Նախկինում նա երկու անգամ դարձել էր աշխարհի, մեկ անգամ՝ Եվրոպայի չեմպիոն»:
Մեր զրուցակիցը հավելեց, որ «Էթնո-ֆոլկ» մրցույթում եւս Գարիկ Պետրոսյանն առաջին տեղն է նվաճել:
Մանրամասն՝ տեսանյութերում:
Լուիզա ՍՈՒՔԻԱՍՅԱՆ
