ՀՅԴ խմբակցության պատգամավոր Աղվան Վարդանյանը գիտի Սահմանադրության այն դրույթը, որ պատգամավորը քվեարկության ժամանակ պարտավոր է առաջնորդվել խղճով եւ ժողովրդի ձայնով ու այդ է պատճառը, որ վարչապետի ընտրության օրը խորհրդարանում դեմ գնաց կուսակցության եւ խմբակցության որոշմանը եւ «դեմ» քվեարկեց Նիկոլ Փաշինյանի թեկնածությանը: Լրագրողների հետ զրույցում նա այսօր ասաց, որ նաեւ իր ելույթում է ամենն ասել:
Հիշեցնենք, Աղվան Վարդանյանն այսօր արդեն դիմում է ներկայացրել`մանդատը վայր դնելու մասին: Նա այսօր այդ պատճառով էր եկել խորհրդարան:
Aravot.am-ի հարցին`իրեն ՀՅԴ-ից կհեռացնե՞ն, Աղվան Վարդանյանը պատասխանեց. «Կուսակցական ընկերների հետ քննարկումներ կունենանք եւ դուք կտեղեկացվեք»:
Լրագրողներից մեկի հարցին`ՀՀԿ-ում իր դեմ կոմպրոմա՞տ են ներկայացրել`իր սոցապ նախարար եղած տարիներին մանկատան երեխաներին տրամադրվելիք բնակարանների յուրացումների հետ կապված, այդ պատճառով քվեարկեց ՀՀԿ-ականների նման, Աղվան Վարդանյանը պատասխանեց. «Մոռացեք: Այդ ծրագրով պետությանը ոչ մի կոպեկի վնաս չի տրվել եւ այդ զառանցանքները վաղուց հերքվել են»:
Հետայսու, Աղվան Վարդանյանը զբաղվելու է «Աղվան Վարդանյանի բուռն գործունեությամբ»: Թե դա ո՞րն է`չհստակեցրեց:
Նելլի ԳՐԻԳՈՐՅԱՆ
