«Երեկ, երբ ամբողջ ազգը հեռուստացույցներով, համակարգիչներով, փողոցներում ավտոմեքենաների մեջ նայում եւ լսում էին ազգային ժողովում կատարվող խայտառակությունը, մտքովս մի բան անցավ՝ այ ձեր ցավը տանեմ, տասը տարի ա մեզ տանջել եք, հիմա էս ութ ժամն է՞լ պիտի տանջե՞ք արա»,-իր ելույթն այսպես սկսեց դերասան Հայկ Մարությանը (Կարգին Հայկո) այսօր Հանրապետության հրապարակում, որտեղ ընթանում է ընդդիմության հանրահավաքը:
Նրա խոսքով, օրվա վերջում նայելու ենք հանրապետականներին ու ասենք՝ «արա ոնց եմ ես ձեզանից զզվում»:
Նրա խոսքով, ո՞նց կարող է ձեր մտքով անցնի, որ Նիկոլը մեր վարչապետը չէ. «Ես, որ գնում եմ տուն՝ կնոջս հարցնում եմ՝ վաղը երեխաները գնո՞ւմ են դասի թե՝ չէ, ասում է՝ սպասի տեսնենք Նիկոլն ի՞նչ է ասում: Վաղը գնո՞ւմ ենք առեւտուր անելու, թե՝ չէ, ասում է՝ սպասի տեսնենք Նիկոլն ինչ է ասում: Այ ձեր ցավը տանեմ, Նիկոլ ջան, էս ինչ բերիր մեր ընտանիքի գլխին»:
Հայկ Մարությանի խոսքով, Նիկոլ Փաշինյանը երեկ, այսօր եւ արդեն մեկ ամիս, դե ֆակտո, ղեկավարում է մեր երկիրը. «Ես ձեզ հետաքրքիր դեպք եմ ուզում պատմել, որն իմ աչքով եմ տեսել: Մի օր, երբ պարոն Փաշինյանը հայտարարեց, որ ժամը 12-ից սկսում ենք մեր ակցիաները, ես 11 անց 58 կանգնած էի մի խաչմերուկում, որտեղ կանգնած էին բազում երիտասարդներ: Ես շատ ուշադիր նայում ի ժամացույցին, ուղիղ 12-ին սաղ փողոցը փակեցին»:
Լուսինե ԲՈՒԴԱՂՅԱՆ
