Հանրապետության հրապարակում մեկնարկեց «Իմ քայլը» նախաձեռնության հանրահավաքը:
Նախաձեռնության անդամ Արայիկ Հարությունյանը հայտարարեց, որ այսօր տեղի է ունեցել նաեւ տեղեկատվական տեխնոլոգիաների մասնագետների կողմից անհնազանդություն. «Տարբեր երկրներում մեր հայրենակիցները՝ ԱՄՆ-ից, Չեխիայից, Ռուսաստանից, Գերմանիայից, մեկ ժամով նախազգուշական արգելափակել են մի շարք նախարարությունների կայքեր, իհարկե դա չի վերաբերել այն գերատեսչությունների կայքերին, որոնք ապահովում են մեր անվտանգությունը»:
Նշենք, որ «IT անհնազանդություն» գործողությունը ծրագրել էր «Ալիք Մեդիա» կայքի ղեկավար Արսեն Խառատյանը, որն իր ֆեյսբուքյան էջում երեկ գրել էր. «Ուրեմն վաղը, Երեւանի ժամանակով ուղիղ 12:00-ին` կեսօրին, աշխարհի տարբեր ծայրերից ինտերնետի միջոցով պարզապես մտնում ենք ՀՀ կառավարության եւ առընթեր մարմինների պաշտոնական կայքերը: Մեծաթիվ այցելությունների դեպքում կայքերը պարզապես ոչ ֆունկցիոնալ կլինեն: Ակցիան անում ենք ուղիղ 1 ժամով, որպես ուժի ցուցադրություն, մինչեւ Երեւանի ժամանակով 13:00-ն»: Բացառություն էր արվել ՊՆ-ի, ԱԱԾ-ի եւ ԱԳՆ-ի կայքերի համար:
Արայիկ Հարությունյանը նաեւ ասաց, որ ցուցարարները, բարկացած երեկվա նիստից, գնացել են պատգամավորների թաղամասեր. «Մենք ասում ենք, որ յուրաքանչյուր պատգամավոր քաղաքական պատասխանատվություն է կրելու իր ընտրության համար: Եվ այդ ընտրությունից հետո ինքը պետք որոշի կարողանալու նայել իր հարեւանների բարեկամների աչքերին, թե թաքնվելու է տներում»:
Լուսինե ԲՈՒԴԱՂՅԱՆ
