«Ինչպես արդեն հայտնել ենք, քիչ առաջ ավարտվեց ՀՀԿ խմբակցության նիստը եւ նիստից հետո խմբակցության ղեկավար Վահրամ Բաղդասարյանը հայտարարեց իրենց որոշումը:
Նրա խոսքով՝ «Մենք դրական ենք գնահատում փաստը, որ ԱԺ քննարկումներում խորհրդարանական 4 խմբակցությունների կողմից հնչեցվեցին բոլոր մտահոգությունները, որոնք կան երկրում ստեղծված իրավիճակը հանգուցալուծելու տեսանկյունից: ՀՀԿ-ի կողմից հնչեցված մտահոգությունների կողմից մի մասը վարչապետի թեկնածուի հետ հարցուպատասխանի ընթացքում փարատվեց,բայց ամենակարեւորները դեռ մնացել են անպատասխան: Այդ հարցերը անկյունաքարային են եւ ոչ թե ՀՀԿ-ի, այլ՝ մեր երկրի վաղվա համար: ՀՀԿ-ն լուռ ու անպատասխան իր վրա վերցրեց մեղադրանքները, որոնք իր հետ քիչ կապ ունեին:
Վերցրեց հանուն երկրի, հանուն վաղվա հույսով, ովքեր պետք է ընկալեին, ընկալեցին մեր ասելիքը: Այժմ հաշվի առնելով երկրին անհապաղ կայուն ընթացք վերադարձնելու հրամայականը, ի գիտություն ընդունելով այս տարվա մայիսի 1-ին ՀՀ վարչապետի ընտրության գործընթացում հնչած դիրքորոշումներն ու քվեարկության արդյունքները, ՀՀԿ խմբակցության անունից հայտարարում ենք՝ ՀՀ-ն մայիսի 8-ին ունենալու է սահմանադրական ճանապարհով ընտրված վարչապետ: ՀՀԿ-ն վարչապետի թեկնածու չի առաջադրելու, խորհրդարանի 1/3-ի կողմից առաջադրված թեկնածուին աջակցելու է՝ դառնալ վարչապետ: Կոչ ենք անում անհապաղ վերացնել տիրող անընդունելի վիճակը, բացել մայրաքաղաքի ու ՀՀ փողոցներն ու մայրուղիները, շտապ դադարեցնել օդանավակայանի շրջափակումը, դադարեցնել անհանդուրժողականության քարոզը եւ վերադառնալ սահմանադրական ճանապարհով ենթադրվող անհրաժեշտ գործողությունների դատ»:
Քանի որ հայտարարության տեքստում չկա Նիկոլ Փաշինյանի անունը, լրագրողները ճշտեցին՝ այսինքն, սատարելու եք Նիկոլ Փաշինյանի՞ն՝ Վահրամ Բաղդասարյանը պատասխանեց, որ շատ պարզ է գրված. «Դու ընկալի, ում էլ առաջադրեն 1/3-ի կողմից, մենք աջակցելու ենք, որը ՀՀԿ-ի թեկնածուն չի լինելու»:
Թե ի՞նչը ստիպեց, որ փոխեն իրենց դիրքորոշումը, ինչո՞ւ երեկ նույնը չարեցին՝ Վահրամ Բաղդասարյանը պատասխանեց. «Մեզ պետք էր բացահայտեինք այն ամենը հարցուպատասխանի միջոցով, մենք բացահայտեցինք, արդեն մայիսի 8-ին այդ հարցերին կանդրադառնանք: 1/3-ի կողմից առաջադրված թեկնածուին կաջակցենք, մենք անուն չենք նշում»:
Հռիփսիմե ՋԵԲԵՋՅԱՆ
