Երեւան-Սեւան միջպետական ավտոճանապարհը եւս այս պահին փակ է ցուցարարների կողմից, որոնք դիմել են վերամբարձ կռունկի եւ բեռնատարի օգնությանը: «Ազատության» ուղիղ եթերում նրանք հայտարարեցին, որ իրենց պահանջն է՝ ՀՀԿ-ն ԱԺ-ում այլեւս չպետք է մեծամասնություն կազմի:
Տղամարդկանցից մեկը հայտարարեց՝ ճանապարհը կբացեն այն ժամանակ, երբ Նիկոլ Փաշինյանի՝ վարչապետի պաշտոնում թեկնածությանը դեմ քվեարկած ՀՀԿ-ական պատգամավորները հրաժարականի դիմում ներկայացնեն: Իսկ մինչ այդ, ճանապարհը կբացվի միայն այսօր ժամը չորսին, որպեսզի մարդիկ կարողանան հասնել Երեւան՝ յոթին կայանալիք հանրահավաքին:
«Երեկ հավատ կար, որ գոնե վերջին պահին որոշում կկայացվի, բայց հուսախաբ եղանք, հետո՝ ավելի ոգեշնչվեցինք: Բոլորս ենք նույն պահանջը ներկայացնում»,-ԱԺ երեկվա նիստում քվեարկության մասին ասաց ցուցարար-վարորդներից մեկը:
Սեւանից ցուցարար Ռուզան Հակոբյանն էլ հայտարարեց՝ չի հավատում երեկ ՀՀԿ-ական պատգամավոր Արփինե Հովհաննիսյանի ասածին, թե ցուցարարների՝ ճանապարհը փակելը խոչընդոտել է իր բարեկամներից մեկի հուղարկավորությանը: «Հարգում ենք մահացածների հիշատակը, բայց փաստորեն հուղարկավորությունից են նեղվո՞ւմ…մարդիկ շատ ավելի մեծ խնդիրներից են նեղվում: Ապրողներին էլ մի մոռացեք, մի ամբողջ ժողովուրդ այսօր շատ կարեւոր խնդիրների համար է ոտքի կանգնել»,-դիմելով ՀՀԿ-ականներին՝ ասաց Ռուզաննան:
Լուիզա ՍՈՒՔԻԱՍՅԱՆ
Լուսանկարում՝ փակել էին նաեւ Աշտարակի մայրուղին
