Դուք բացառո՞ւմ եք, որ մեկ շաբաթվա ընթացքում ՀՀԿ-ն կպառակտվի`հարցին ի պատասխան, խորհրդարանում, լրագրողների հետ զրույցում, ՀՀԿ խմբակցության պատգամավոր Ալիկ Սարգսյանը պատասխանեց. «Ես առայժմ նման բան չեմ տեսնում, չեմ էլ մտածում: Ինչ բառ սկսում է «դ» տառով, այսինքն` դավաճանություն, ես այդ գործում չկամ, մոռացեք»:
ՀՀԿ խմբակցության պատգամավոր Ֆելիքս Ցոլակյանի երեկվա քվեարկության մասին Aravot.am-ի հարցին Ալիկ Սարգսյանը չցանկացավ պատասխանել: «Ես գնահատական չեմ ուզում տալ, ամեն դեպքում, ես չեմ անի»,- ասաց նա:
Ավելի ուշ մեր նույն հարցին ի պատասխան ասաց, որ խոսել է Ֆելիքս Ցոլակյանի հետ, իրենք ընկերներ են: Ֆելիքս Ցոլակյանը բացատրել է իր քայլը: Բայց Ալիկ Սարգսյանի կարծիքով, ինչ-որ մի բան Ֆելիքս Ցոլակյանը չի ասել: Թե`ի՞նչը, ինքը կարող է զուտ ենթադրություններ անել, բայց ոչ բարձրաձայն:
«Աշխարհի վերջը գա, ես թիմին չեմ դավաճանի, կդնեմ մանդատս, կգնամ տուն, բայց թիմիս չեմ դավաճանի»,-ասաց նա:
Aravot.am-ի դիտարկմանը, որ երեկ Ֆելիքս Ցոլակյանի անունը հրապարակում ոսկե տառերով գրեցին ժողովրդի սրտերում, Ալիկ Սարգսյանը պատասխանեց. «Թող գրվի, ադամանդից տառերով թող գրվի, ես բան չունեմ ասելու: Ես էս ամբողջ տարիների ընթացքում, մանավանդ 2012 թվականից, էնքան եմ առնչվել դավաճանության հետ, աշխարհի վերջը գա՝ ես թիմ չեմ դավաճանի, իմ կողքի ընկերներին չեմ դավաճանի»:
Հարցին`այդ դեպքում ինչպե՞ս է գնահատում այն բոլոր ֆաշիստներին, ովքեր մինչեւ վերջ հավատարիմ մնացին Հիտլերին, նա պատասխանեց. «Ես ոչ թե գնահատում եմ կամ ֆաշիստների մասին դրական բան կասեմ, որովհետեւ իրենց գործը վատն է եղել, բայց իշխանության գաղափարախոսությամբ, իրենց մարդկային տեսակով վատ չի, որ հավատարիմ են եղել Հիտլերին: Իսկ որ կողքից փախնեին, ո՞վ էր նրանց ներելու, կասե՞ք»:
Ալիկ Սարգսյանն ասաց, որ ինքը «ռեալ քաղաքական գործիչ է», իր գնահատականներն այս շարժմանը մի օր կտա. «Էս շարժումը հասունացել էր: Թող ոչ մի քաղաքական լիդեր սա իր վրա չվերցնի: Թող անհրաժեշտ հետեւություն անեն… դրա համար երկխոսություն պիտի լինի, մի ջնջեք անցյալը, ես հասկանում եմ երիտասարդությանը»:
Նելլի ԳՐԻԳՈՐՅԱՆ
