Այսօր առավոտյան ժամը 8.15-ից ցուցարարները շրջափակել են Գյումրու բոլոր փողոցներն ու պետական կառույցները:
Գիշերվանից փակ է նաև դեպի Մայիսյան տանող ճանապարհը. Նշենք, որ սա դեպի Վրաստան տանող միջպետական ճանապարհն է: Թալիշի պաշտպանությանը մասնակցած հերոսներն էլ փակել են դեպի Մարմաշեն տանող ճանապարհը:
Մարզում տրանսպորտ գրեթե չի աշխատում. Գյումրու երթուղային տաքսիների վարորդները ևս գործադուլ են հայտարարել: Բուհերում և դպրոցներում համատարած գործադուլ է:
Ցուցարարները Շիրակի մարզպետարանի աշխատակազմին չեն թույլատրում ներս մտնել. Աշխատակազմը` Շիրակի մարզպետ Արթուր Խաչատրյանի գլխավորությամբ, առավոտից կանգնած են դիմացի մայթին: Աշխատավայր մտնելու շուրջ բանակցությունները չեն ստացվում:
Մարզպետարանի աշխատակազմը մտահոգ է, որ այսօր ցուցակները չստորագրելու դեպքում հնարավոր չի լինի դպրոցներում աշխատավարձ տալ, մինչդեռ, ըստ նրանց՝ շատերը վարկերի տակ են ու չեն կարող տոկոսադրույքներն ուշացնել:
Ցուցարարները ցրված են քաղաքի բոլոր հատվածներում. Նրանց մի մասը քաղաքապետարանում է, քաղաքի տարբեր հատվածներում դպրոցականների ու ուսանողների տարբեր խմբեր կոչ են անում քաղաքացիներին միանալ համազգային պայքարին:
Փողոցները փակում են նաև մանկահասակ երեխաների մանկասայլակներով:
Նունե ԱՐԵՎՇԱՏՅԱՆ
