«Օդանավակայանը փակելով… հազար տեսակ հարց կա, մարդիկ`մեկը թաղում է գնում, մեկը հարսանիք է գնում: Էս ի՞նչ է կատարվում: Մարդիկ ճամպրուկներով Իսակովի ճանապարհն են անցնում»,- խորհրդարանում լրագրողների հետ զրույցում իր վրդովմունքը արտահայտեց ՀՀԿ խմբակցության պատգամավոր, նախկին ոստիկանապետ Ալիկ Սարգսյանը:
Նա Նիկոլ Փաշինյանին կոչ է անում նստել երկխոսության ու զարմանում է, որ ընդդիմադիրները այս ամբողջում բացի «երկիրը պարալիզացնելուց՝ այլ վտանգներ չեն տեսնում»:
Aravot.am-ի հարցին`որոնք են լուծումները, ՀՀԿ-ն էլ հակված չէ երկխոսության, Ալիկ Սարգսյանը պատասխանեց. «ՀՀԿ-ն հակված է: Թող նստեն երկխոսության, որոշեն՝ ինչ են անում, էս ճգնաժամը հաղթահարեն»:
Ալիկ Սարգսյանը հասկանում է ժողովրդի պահանջները: Ասում է`Նիկոլ Փաշինյանը չլիներ, Պողոսյանը լիներ, կարող է այս վիճակը լիներ. «Հարցը դրանում չէ, ուղղակի ես տեսնում եմ, որ պետք է լուծում ստանա, այսօր պարալիզացվել են բոլոր հիմնարկները,-ասաց նա:
Մեր հաջորդ հարցին`երեկ Նիկոլ Փաշինյանը հայտարարեց, որ բանակցությունները մեկ օրակարգ կարող են ունենալ`ՀՀԿ-ի հեռանալու, Ալիկ Սարգսյանը պատասխանեց. «Ես չգիտեմ: Դե ասում է, իր ասելով էլ շարունակեք մինչեւ վերջ: Պարալիզացրեք ամբողջ երկիրը, ուրիշ ոչ մի վտանգավորություն դրա մեջ մի տեսեք`բացի պարալիզացնելով, ճանապարհ փակելով իշխանությանը ստիպեք կամ մի ստիպեք… Պիտի նստեն երկխոսության եւ ընտրեն մի տարբերակ որը բխի ժողովրդի շահերից եւ մեր պետականությունը չվտանգի: Ես չեմ տեսել երկխոսություն, որ արդյունք տվել է կամ ոչ: Ես տեսել եմ միայն ուլտիմատում»:
Այլ մանրամասները`քիչ ուշ`տեսանյութում
Նելլի ԳՐԻԳՈՐՅԱՆ
