ՀՅԴ խմբակցության ղեկավար Արմեն Ռուստամյանը «շատ խիստ» գնահատական է համարում Նիկոլ Փաշինյանի այն հայտարարությունը, որ ՀՀԿ-ն ինքնաոչնչացմամբ եւ ինքնափչացմամբ է զբաղված:
Նա կարծում է, որ կողմերը պետք է բանակցությունների համար տեղ թողնեն: Հարցին`բախման վտանգ կա՞, նա ասաց` հուսով է, որ բանը դրան չի հասնի եւ ամեն ինչ իրենք անում են, որ հանգուցալուծումը խաղաղ լինի:
ՀՀԿ-ականների մտավախությունների առնչությամբ՝ Ադրբեջանի ակտիվության եւ արտաքին ուժերի միջամտությունների մասով, Արմեն Ռուստամյանն ասում է`այդ խնդիրը կա, հետեւաբար հանգուցալուծումը երկար չի կարող տեւել:
Ըստ նրա, գերտերությունները չեն կարող հաշվի չնստել Հայաստանում ստեղծված իրավիճակի հետ եւ միջամտելու փորձեր կանեն: «Մենք ինքներս գիտենք, որ այդ շարժումները եղել են, կան տեսագրություններ»,- ասաց նա:
Խոսքը ադրբեջանական զինված ուժերի տեղաշարժի մասին է սահմանում:
ՀՅԴ խմբակցության քարտուղար Աղվան Վարդանյանի հայտարարությունը`Նիկոլ Փաշինյանին «դեմ» քվեարկելու մասին, ՀՅԴ խմբակցության համար անակնկալ է եղել: Աղվան Վարդանյանը կուսակցությունից կհեռացվի՞`ՀՅԴ ԳՄ-ն կորոշի: Հիշեցնենք, ՀՅԴ ԳՆ-ն արդեն հայտարարել է`մանդատը վայր դնելու պահանջի մասին: «Մենք հարգում ենք պատգամավորի քվեարկելու իրավունքը, բայց սա Դաշնակցությունն է»,- ասաց Արմեն Ռուստամյանը:
Նելլի ԳՐԻԳՈՐՅԱՆ
