«Ծառուկյան» դաշինքի պատգամավոր Գեւորգ Պետրոսյանը ԱԺ-ում Նիկոլ Փաշինյանին հարցրեց արտագաղթից, ժողովրդի սոցիալական վիճակից: Նա ասաց, որ դրան նպաստել է հարկային, մաքսային տեռորը, արդարության բացակայության մթնոլորտը: Նա ասաց, որ ժողովուրդը հավատում է Փաշինյանին, բայց պետք են երաշխիքներ, արդյոք հույս ունենա՞նք, որ ձեր ընտրվելու դեպքում մենք չենք ապրելու այն Հայաստանում, որտեղ մարդը ամենափոքր արժեքն է, որտեղ ՓՄՁ-ն կեղեքվում է հարկային մարմինների կողմից, հանապազօրյա հացի համար սահմանից մեկ արկղ մանդարին կրողը ենթարկվում է հալածանքների եւ մաքսային մարմինն ավելի դաժան է, քան հակառակորդի գերեվարված զինվորի նկատմամբ վերաբերմունքը, արդյոք չե՞նք ապրի այն Հայաստանում, որտեղ ձու գողացողը անազատության մեջ է, ձի գողացողը՝ փառքի մեջ: Երաշխի՛քն է պետք տալ, ոչ թե խոստումներ:
Փաշինյանը պատասխանեց, որ արդար Հայաստան ունենալը օրախնդիր է, իսկ երաշխիքները պետք է ստեղծվեն հընթացս. «Այս ամբողջ շարժումն ի՞նչ իմաստ կունենա, դուք պատկերացնո՞ւմ եք, մենք այսօր պայքարում ենք մարդկանց հիասթափության եւ հուսահատության դեմ, պատկերացնո՞ւմ եք, եթե այս փոփոխությունից հետո պարզվի, որ ձեր ասած այս բոլոր երեւույթները կամ առնվազն մի մասը շարունակում են գոյություն ունենալ: Բա այս ամեն ինչը ինչի՞ համար է: Մենք հիմա ունենք ամենակարեւոր երաշխիքը, երաշխիքը այս դահլիճում չի, հրապարակում կանգնած ժողովուրդն է, որն այլեւս չի հանդուրժելու՝ ես լինեմ, դուք լինեք, ով ուզում է լինի: Վե՛րջ, աջ-ձախ չի լինելու, ՀՀ-ում իշխանության տերը ժողովուրդն է: Այն իշխանությունը, որը հոտառությունը կորցրեց, ով ուզում է լինի, ինքը տապալված է ՀՀ-ում»:
Նա ասաց, որ մնացածը օրենսդրական եւ քաղաքական կարգավորումների խնդիր է: ՀՀ-ում կարող է մարդը ինչ-որ բան ներկրի ու ասեն՝ չես կարա, ասեն ինչի՞, ասեն՝ տենց: Օրենքով, իրավունքով կարաս, բայց ասեն՝ չէ: Դա վերանալու է, ոչ թե ինչ-որ մարդկանց հետապնդելու ենք, ձախողելու ենք, սնանկացնելու ենք: Բացարձակապես: Մենք ընդամենը դե ֆակտո գոյություն ունեցող արգելքները վերացնելու ենք եւ դա անելու ենք հրապարակային ու թափանցիկ»:
Ըստ Փաշինյանի, այդ տեռորի զգացումը միայն նրանից չի, որ մարդը վճարում է, նրանից է, որ վճարում է ու տեղ չի հասնում:
Փաշինյանն ասաց, որ ՀՀ-ում հարկային-մաքսային որեւէ տեռոր այլեւս չի լինելու:
Հռիփսիմե ՋԵԲԵՋՅԱՆ
